Chanmari an tho chhuak ang em?

LZ Juice MPL11-ah Chanmari FC-in inelna ṭantirh aṭanga round 9 thleng pakhatna dinhmun luah mah se match hnuhnung bera Sihphir Venghlun laka an mualpho avangin pahnihnaah an tla thla.

Nimin inkhelah Aizawl FC-in FC Bethlehem an sawp a, I League club hian pakhatna dinhmun an sawhnghet. Chanmari FC tan league champion ni turin chetsual a thiang tawh lo. Vawiin chhun dar 12:00 hian Lalsangzuala Hmar hoten SYS FC an hmachhawn dawn a, chak ngei a ṭul dawn.

Chanmari FC hian I League 3 final round khel turin September 22, Pathianni hian Kolkata an pan dawn a, SYS FC hi kim taka league round an khelh hnuhnun ber tur a ni. Coach Lalsangzuala Hmar chuan, "Semifinal kan khel turah inngai ta ila, tuna kan tana pawimawh ber chu I League 3 a ni. Kolkata kan pan hmaa chak ngei hi kan tan a pawimawh," tiin Vanglaini a hrilh.

Chanmari hian Sihphir Venghlunah player an siksawi nasa a, a bik takin tlarhnungah captain Lalrinchhana Tochhawng awm lo an tuar. SYS lakah an ṭhat dan berin an rawn inrem dawn a, captain Rinchhana pawhin bul a ṭan ang.

Chutihrualin SYS tan semifinal khel turin chak ngei a ṭul a, MPL11 leh I Day Football-a an inhmachhawn ṭumin Lunglei club hi a vanduai zawkah an ṭang ve ve. Lalmuankima hote hian season khata Chanmari laka vawi thum tlawm an duh dawn lo a, hei bakah hian semifinal khelh an tum a nih chuan point hlawhchhuah ngei a ṭul a ni.