Tlai dar 3-ah inkhel pawimawh Ramhlun Vs Chawnpui

LZ Juice MPL11-ah vawiin tlai dar 3:00 hian Ramhlun Athletic leh Chawnpui FC te an inkhel dawn a, semifinal khel tur zawnna inkhel pawimawh a ni.

Aizawl FC leh Chanmari FC te semifinal khel turin an tling tawh a, FC Bethlehem tan beisei ngam chi a tawh lo thung. Hmunruak pahnih la awm hi Mizoram Police, Sihphir Venghlun, SYS FC, Ramhlun Athletic leh Chawnpui ten an inchuh ang.

Ramhlun leh Chawnpui hian point 11 ve ve an hmu a, Danny Lalduhawma enkawl Ramhlun hote hi an intum hmasak ṭumah 4-1 a an chak avangin head to head-ah an ṭha zawk. Chutihrualin head to head aiin point a pawimawh zawk a, Chawnpui hian hnehna an chan hrim hrim chuan Ramhlun aiin point thumin an hmu tam zawk dawn.

Chawnpui hian phase 2 aṭangin coach Lalrindika Hmar an lalet a, Rindika Hmar hnuaiah Sihphir Venghlun leh FC Bethlehem te an hneh a, relegate thei team khan semifinal beiseina an nei sang leh tawh hle.

MPL9 champion hian an Ramhlun hi an tawn hmasak ṭumin 4-1 in an hneh lo a, tun ṭumah erawh coach thar hnuaiah khelh dan phung thar an neih bakah player thar an neih tel avangin vawiin inkhel tur hi an inkhelh tawhna aṭanga teh chi a ni lo ang.

Ramhlun forward Felix Lalruatsanga'n an intawn hmasak ṭumin goal hnih a khung a, Serchhip tlangval hian MPL11-ah goal riat a khung tawh. Nimin inkhelah Aizawl FC forward Lalbiakdika'n goal li a khung a, Felix hian BD-a hi goal thumin a pha lo a, top scorer nih a tum a nih chuan hahchawl hman a ni lo tih a inhria ang.