Old Trafford-ah hlimna a thleng

Manchester United-in Thawhlehni zan khan Barnsley an mikhual a, League One club hi 7-0 in an sawp. Erik Ten Hag-a hoten League Cup fourth round an lut a, goal sarih ngawt an khung bakah goal an chhuah loh avangin Old Trafford-ah hlimna a thleng.

Goal sarih luh zanah Marcus Rashford, Alejandro Garnacho leh Christian Eriksen ten goal hnih ṭheuh an khung a, Antony-a'n penalty aṭangin a khung ve bawk. Man United-in February 2021-a Southampton 9-0 a an sawp hnua an khingpui sawp leh nasat ber a ni a, tun ṭuma mi danglamna chu entu an awm. Saints an sawp ṭum kha chuan Covid-19 vanga entu awm loh lai a ni.

Goal a sur

Ten Hag-a'n a vawi khat nan £50.5mtd man Manuel Ugarte bul a ṭantir a, ṭan phat aṭangin Man United inkhel a nung hle. Minute 16-na lekah Garnacho ball vawrh chu Rashford-a'n la thlain, English forward hian la thlain Barnsley player pahnih a bum hnuah kawh zetin a pet goal.

United-in inkhel an thunun a, Rashford-a through ball chu Antony-a'n um lutin goalkeeper lakah penalty a hlawh chhuak a; Brazilian forward hian penalty hi minute 35-naah a khung nghal.

First half injury time-ah Rashford-a ball lakluh tum chu Barnsley player-te pet sawn mah se a per chu Garnacho-a'n um lutin goal kilah ṭha zetin a pet lut. Halftime-ah mualneituin 3-0 in hma an hruai a, second half-ah pawh an chungnung zel.

Minute 49-naah Eriksen-a through ball chu Garnacho-a'n um lutin United goal lina a khung a, chak tur chiang tawh mah se mualneitu lamin an la duh tawk lo. Rashford-a'n minute 58-naah goal hnihna a khung belh.

Ten Hag-a nauten inrintawkna an ngah a, passing game mawi hmangin Barnsley tlarhnung an ṭhiat. Minute 81-naah Bruno Fernandes-a pek chu Eriksen-a'n a khung a, minute li hnuah Portuguese midfielder pek bawk chu Eriksen-a bawkin a khung.

Zan duhthusam

Man United boss Ten Hag chuan, "Kan tan chuan zan duhthusam a ni, kan ruahman angin engkim a thleng. Round sang zawkah kan inpet kai a, goal ṭha kan khung a, entu tan lawmna kan siam a, kan khelh dan zirna hun kan nei bawk. Kan lawm takzet," tiin thil thlen danah a lawm thu a sawi.

English club hian season bul an ṭan ṭha lo a, Ten Hag-a ban duhtu pawh an ṭhahnem hman hle. Mahse, Southampton an hneh zawhah Barnsley an sawp avangin thawk lakna hun an nei. Tunkar tawp hian Man United-in Selhurst Park-ah Crystal Palace an hmachhawn ang .

Man United tan lawmna tur ṭhahnem tak a awm. Rashford-a'n match zawnin goal a khung a, Garnacho a hriam zel a, sawisel hlawh Antony-a'n goal a khung. Player kum la upa Casemiro leh Eriksen te khelh danah lawmna tur a awm bawk.