Police-in Sihphir Venghlun inkhelh an zirtir nawn

LZ Juice MPL11-ah goal a sur chhunzawm a, niminah ringawt goal 20 a lut - a tam mah mah! Inkhel hnuhnung zawkah Mizoram Police-in 6-0 a an sawp tawh Sihphir Venghlun chu 7-1 in an sawp nawn a, MPL champion laiin semifinal khel turin kawng dik an zawh.

Police tan captain Lalfakzuala che a hmuhnawm a, man of the match-ah thlan ni lo mah se goal hnih a khung bakah goal dang luh nan a pawimawh avangin chiang taka an chakna kawngah a ṭangkai hle.

Nimin tlai inkhelah hian ṭan phat aṭangin Police an chungnung zawk a, R. Malsawmtluanga'n crossbar a pet per bakah H. Lalbiakthanga'n goal ban a pet per. Minute 34-naah Fakzuala'n goal a khung ṭan a, hemi hnu hi chuan Sihphir Venghlun tlarhnungten Police tlarhmate ven ngaihna an hre lo a ni ber.

Fakzuala penalty hlawhchhuah BT-a'n a khung a, first half-ah 2-0 a ni. Second half ṭantirhah Police keeper F. Lalmuanawma chesual mah se Police an buai phah lo.

Fakzuala ball pass chu Michael Lalbiaksanga'n goal ruakah a khung a, corner kick aṭanga ball kal chu Lalhmunmawia'n a ti goal. Police captain ball pet chu Sihphir Venghlun keeper-in dang nghet zo loin Isak Malsawmkima'n a khung.

Box pawn aṭangin Fakzuala hian freekick mawi zetin a khung a, a tawp khar nan player hmabak nei êng B. Rosangliana'n goal sarihna a khung. Police-in 7-1 in hnehna an chang a, semifinal ticket la nei lo mah se an chak dan thlirin knockout stage hi an luh a rinawm ta hle.