Europe-ah Alonso enkawl Leverkusen

Bayer Leverkusen hian season hmasa khan Xabi Alonso enkawlna hnuaiah hun duhawm an hmang a, an duhthusam ang a thlen lohna pakhat chu European fooball chauh a ni.

Season thar an ṭan a, tunah chuan Champions League an khel dawn. Zanin dar 10:15 hian Bundesliga champion hian Feyenoord an lenchilh dawn - European football inelna sang berah hian eng ang taka ṭha nge an nih kan hria ang.

Feyenoord hian 2023 khan Dutch League nomawi an chawi a, a vawi 16 nan an champion - season hmasa erawh kha chuan pahnihna an ni thung a, an manager Arne Slot chuan Liverpool lam a pansak bawk.

Manager thar Brian Priske kaihhruaina hnuaiah beisei angin an la nghet tawk lo, league match vawi li an khelh tawhah point ruk chauh hmuin table-ah pasarihna dinhmun an luah mek - hmahruaitu PSV Eindoven (15 points) an tlau rih hle.

Kum 2002 hnua a vawi khat nan a zawnin Champions League an khel dawn a ni a, season hmasa khan group stage paltlang loin Europa League lamah an tla zui, kuminah manager thar Priske hoa hmasawn an duh a nih chuan a bul ṭan fuh a pawimawh dawn.

Leverkusen tan UCL hi thil thar ni lo mah se, coach Alonso hoa an zinkawng pawimawh tiin a sawi theih, an player ṭha bik zinga mi Florian Wirtz tan phei chuan Champions League match hmasa ber a ni dawn, a theihna fiahna hun a ni ang.

Kum 21 mi Wirtz hi tun hnaiah a kum zawnin Europa League Young Player of the Year atan thlan a ni a, season hmasa khan Europa League final an thlen theih nan a thawh hlawk hle, goal li a khung bakah a ṭhiante khung tur vawi li a siamsak bawk.

Gemany midfielder Wirtz chuan, "Mitin mai hian mahni nihna leh theihna fiah kan duh vek, kei ngei pawhin ka duh ve bawk. Tun season chu kei leh kan team tan fiahna a ni zel ang," tiin a sawi.

Season hmasa lama Alonso leh a naute chet dan kha mi ṭhenkhat chuan tih fuh laklawh nia ngai tawk an awm, Spanish coach leh a team hi eng ang taka ṭha nge an nih chuan khawvelin a thlir mek a, club lian ho zingah pawh ngaihven hlawh an tling ṭhin.