MVA referee clinic leh exam

Mizoram Volleyball Association (MVA) chuan District Volleyball Association ngenna vangin referee clinic & examination an buatsaih, vawiin khan neih ṭan niin ruahman dan chuan September 20, Zirtawpni thleng a awh ang.

Tuikual Indoor Stadium-a hun hmanah hian district hrang hrang aṭangin mi 25 an tel thei a. Resource person atan Lalduhawma Hnamte, national referee leh Lalmuanpuia, state referee-te an ni.

C. Lalrokhuma (Puitea), GS MVA chuan, "Volleyball-a hmasawn tur chuan technical a hmasawn hmasak a ngai a, tun ṭuma training te hi Mizoram Volleyball ti hmasawntu turte in ni. Player te'n hmasawn turin nitin an practice a; match official-te pawhin hmasawn turin theihtawpa theory leh practical a inzir hi kan tih ngei ngei tur a ni," a ti.

Puitea chuan sawi zawmin, "Volleyball referee nih hi a zahawm a, player-te zah phua nungchang zahawm neih a ngai bawk a. Huaisen leh rilru dik put a ngai a, eizawnna satliah a ni lo. Chutiang tur chuan referee-te hi kan inbuatsaih ang a, Mizoram Volleyball hian district hrang hrang leh Mizoram pumah hma a sawn zel dawn a, a sawn mek zel bawk a ni," a ti.