Aizawl FC-in insawp record an siam

LZ Juice MPL11-ah Aizawl FC-in nimin khan FC Bethlehem chu 11-1 in an sawp a, MPL history-a insawpna nasa ber a ni. I League club hian tun season-ah league match thum khelh tur an la nei chungin goal 39 an khung a, season liam ta aiin league round pumpuiah an khung zat aiin goal 15-in an khung tam zawk.

RG Stadium-a inkhelah Aizawl FC tan Lalbiakdika'n goal li a khung a, Augustine Lalrochana leh Lalawmpuia Sailo ten goal hnih a khung bakah Laltlanzova, Samuel Lalmuanpuia leh C. Lalhriatpuia ten goal khat ṭheuh an khung. Bethlehem goal awmchhun hi Rohlupuia khung a ni.

Kumin MPL-ah goal a lut tam a, Aizawl FC hian FC Bethlehem hi an intawn hmasak ṭumin 6-1 in an hneh tawh a, nimin inkhelah phei chuan 11-1 in I League club an chak. Bethlehem hi table mawngphahah an awm mek a, match 11 aṭangin point nga chauh la hmuin goal 35 zet an chhuah tawh.

Bethlehem tana mualphona a nih laiin Aizawl FC tan lawmna a ni thung a, goal khung khawl Lalbiakdika phei chu top scorer ni turin dinhmun ṭhaah an awm phah. Champhai Zotlang tlangval BD-a hian tun season-ah goal 11 a khung tawh a, top scorer satliah ni loin season khata goal khung tam ber record siam thei dinhmunah a ding. MPL4-ah khan F. Lalrinpuia'n Aizawl FC tan goal 13 a khung a, Mizoram Police striker Valpuia hi MPL season khata goal khung tam ber record kawltu a ni.