Flick-a 'Barca' tan zaninah fiahna

Coach Hansi Flick-a hnuaia indinthar mek Barcelona chuan zanin dar 12:30 hian tun season-a an Champions League match hmasa ber an khel dawn a, AS Monaco chu khualmualah an lenchilh ang - Flick-a tan 'fiahna' tia sawi theih a ni.

Flick hian tun season aṭangin Barca hi a enkawl ṭan ve chiah a, league match nga an khelh tawhah a chakpui vek. Catalan club hian goal 17 zet khung tawhin, an lamah goal thum chiah a la lut thung.

Barca hian La Liga table chung ber an luah mek a, fans tam takin Pep Guardiola leh Luis Enrique te enkawlna hnuaia an vanglai kha an tawng chho leh dawn niah an ngai mek - zaninah French club hmangin fiahin an awm ang.

AS Monaco pawhin season an hmang chhe bik lo. Ligue 1 match li an khelh tawhah tlawm an la nei miah lo a, match khat draw neiin, vawi thum an chak - an match hnuhnung berah Auxerre chu 3-0 ngawtin an sawp a, mahni muala inkhel tur an nih bawk avangin Barca lakah chak an tum ngam dawn.

Flick-a Barca

Barcelona-in La Liga-ah attacking football hmuhnawm an pho chhuak a, kan hriat ṭhin Barca kha an lo kir leh mek - tlarhma lamah Robert Lewandowski hoin Lamine Yamal leh Raphinha te an tal hiar hle.

Kum 36 mi ni tawh mah se, Lewy a la ṭha reng a, Polish striker hian tun season-ah match nga khelin goal li a khung der tawh a, assist vawi hnih a nei. Kum 17 mi Yamal lah a kum anga teh chi a ni lo tih a lang chiang tawlh tawlh a, match nga a khelh tawhah goal thum leh assist vawi li a nei der tawh!

Raphinha pawhin match ngaah goal thum leh assist vawi thum a nei tawh a, anni pathum hian bul an rawn ṭan ho a nih ringawt pawhin Monaco tan chuan lungngaihna tham a tling ang - match thuma goal thum khung tawh Dani Olmo hliam vangin a inlan thei dawn lo mah mah.

Flick-a'n tlarhnungah Jules Kounde, Pau Cubarsí, Inigo Martínez leh Alejandro Balde te ho a chhawr ṭhin a, an ṭhat viau rualin a nghing ṭhin - league match ngaah vawi khat chiah goal chhuah loh an nei a, Monaco lakah hei hi fimkhur nan hman a ṭul ang.

Hei le Monaco

AS Monaco-in season ṭan hma inbuatsaihna match hnuhnung bera an hmachhawn chu Barcelona an ni a, Catalan club-in Nou Camp an sak ṭhat chhunga an stadium atana an hman Estadi Olímpic Lluís Companys-ah ngei 3-0 in an chak.

Pre-season leh Champions League chu a danglam ang tih a chiang a, mahse, French club hian khualmualah pawh an hneh theih team hi mahni mualah, fans tam tak puihna nen lo hneh an tum dawn - inkhel a hmuhnawm loh ring suh.

Monaco hian Champions League-a an la hmachhawn tur zingah Inter Milan leh Arsenal an tel tih hriat a ṭha a, Benfica leh Aston Villa te pawh chetsual theihna an ni. Barca laka point an hlawhchhuah hi an hmabak match zel atan a pawimawh dawn.

Ligue 1 club hian tun dinhmunah goal khung thei bik tia sawi tur an nei lo a, an tlarhnung hi an innghahna a ni - league match liah goal khat chiah an la chhuah a, tun season Ligue 1-ah Lens nen goal chhuah tlem ber an ni a, goal khung thiam Barca an tawng tur hi en a châkawm hle.