Champion lai Real an chak nghal

Champions League-a an match hmasa berah champion lai Real Madrid chuan goal thum an khung nghal a, VfB Stuttgart chu 3-1 in an hneh. Real tan Kylian Mbappe, Antonio Rudiger leh Endrick ten goal khat ve ve an khung a, German club tana Deniz Undav-a goal khungin awmzia a nei phak lo.

Real-in first half-ah goal khung loin chawlhlawk an hmang a, Stuttgart lakah game duhthusam an khel lo - mahse, second half ṭan aṭanga second 20-naah Mbappe a inlar a, French striker hian Real Madrid tana a Champions League match hmasa berah goal a khung nghal.

Mbappe goal hi Rodrygo siamsak a ni - Aurelien Tchouameni-a ball pass chu Brazilian forward hian goal-a chantir turin hun ṭha nei mah se, mahni hmasial lo takin, Mbappe tan a siamsak a, French striker hian goal-ah a chantir.

Kum 25 mi Mbappe hian Real tan a match hnuhnung pathum aṭangin goal li a khung ta a, La Liga ṭantir lamah sawisel hlawh mah se, French forward hian goal a khung chhunzawm. Real tan match sarih a khelhah goal nga a khung der tawh.

Mahse, Real hian beisei angin inkhel an thunun zui lo a, an talbuai hman hle. Mikhual team tan Deniz Undav chuan minute 68-naah si phurh a sut a, 1-1 a ni der. Santiago Bernabeu-ah Spanish club an talbuai a, champion lai an ang lo!

Real vanneihna erawh inkhel thlak danglam thei player an ngah hi a ni a, minute 83-naah Antonio Rudiger inlarin, an hmahruai nawnna goal a khung a, thawm chu ring tak a ni.

Carlo Ancelotti-a'n chawn hliam vanga match li ngawt a khelh loh hnua bul a ṭantir Jude Bellingham chu minute 80-naah a la chhuak zui a, a aiah hian Endrick a lut. Italian coach-in thutlukna a siam sual lo tih a lang zui.

Hun pek belh minute nganaah Endrick hian Dani Carvajal-a siamsak chu goal-ah a chantir a, Real Madrid tana Champions League-a goal khung thei naupang ber record a siam - kum 18 leh ni 58 mi a ni.

Endrick hmaa Real tana Champions League-a goal khung thei naupang ber chu club legend Raul González kha a ni. Spanish striker hlui hian kum 1995 khan Ferencvaros lakah kum 18 leh ni 113 mi niin a lo khung tawh a, he record hi Endrick hian a khum ta.

Kum zabi 21-naa Real tana a La Liga match hmasa bera goal khung thei naupang ber lo ni tawh Endrick-a'n record a siam leh ta a, Brazilian forward hian record thar a siam zel a rinawm.