Bayern an chak nuamsa

Vincent Kompany enkawl Bayer Munich-in tun season Champions League an match hmasa berah 9-2 in Dinamo Zagreb an sawp nghal a, Belgian coach chuan inkhelh zawhah German club a enkawl dawna amah ringhleltute a chhang nghal.

Kompany hi a tan Bayern enkawl chu a lian mah mahah tam takin an ngaihsak a, hemi chungchang hi Zagreb nen an inkhelh zawhah zawh nghal a ni. Mahse, Kompany chuan, "Thui taka sawifiah ka duh a, mahse, ka hna hi hna harsa a ni lo. Player-te nena thawh ho hi nuam ka ti a, player, team leh keimah thlengin hma kan sawn theih dan tur ka ngaihtuah.

"Chhanna thui zawk ka pe thei che u a, chutianga pek ṭul erawh niin ka hre lo. Tawitê erawh ka sawi lawk dawn - Brussels-ah ka piang a, ka pa chu Congo aṭanga raltlan ve mai a ni. Chutiang mi tana Premier League-a khelh phak a, nomawi chawi a, Belgium tana khelh phak har turzia chu inhrethiam em? Ka chance neih kha 0.000 ang hial a ni ang chu - tunah erawh coach ka nih tak hi," a ti.

Manchester City legend Kompany chuan sawi zawmin, "Midang thusawi vangin mahni inrintawkna in hloh ngai em ni? A pawimawh ber chu kal zel hi a ni a, kan hlawhtlin leh hlawhchham chu kan thu a ni lo. Mahse, hma erawh a sawn theih a, online-a thil chhiar tur chu a awm reng a, mahse, mimal takin ka haw ngai lo - midang min ngaihdan avangin ka chawl ang maw? Mite an hlawhtlin theihna tura fuihtu i ni zawk ang u," a ti zui.

Kompany enkawlna hnuaiah Bayern hian tun season-ah league match thum khel tawhin an chak vek a, goal 11 khung tawhin, an lamah goal thum chiah a la lut - Champions League-a an match hmasa berah goal kua ngawt an khung zui.

Bayern tan Dinamo lakah Harry Kane chuan penalty hmanga hattrick siamin, goal khat dang a khung bawk a, Michael Olise chuan Champions League-a a match hmasa berah goal hnih khung nghalin, Raphael Guerreiro, Leroy Sane leh Leon Goretzka ten goal khat ṭheuh an khung bawk - Croatian club tana Bruno Petkovic leh Takuya Ogiwara goal khungin awmzia a nei phak lo.

Kane hian Champions League-ah goal 33 a khung ta a, Wayne Rooney (30 goals) chu tlanpelin, Champions League-a England tana goal khung hnem ber record thar a siam.