Roma-in De Rossi an ban

Serie A club AS Roma chuan an coach Daniele De Rossi an ban a, tun season Italian football inelna sang bera an mach hmasa paliah chak ni hmel an hmuh miah loh avangin Rossi hian a tuar ta a ni.

De Rossi hian kumin January thla aṭang khan Roma hi a enkawl ṭan, an ban tak Jose Mourinho hmun ruak a luah a ni. A tir lamah hna a thawk ṭha viau a, a contract pawh kum 2027 June thla thleng daih a ni, mahse tunah chuan a club hmangaih nen an inṭhen leh ta zawk.

Roma chuan thuchhuah siamin, "Kawng dik kan zawh leh theihna tur a nih beiseiin club chuan thutlukna a siam, kan boruak hi siam danglam a ngai a ni. Daniele chungah lawmthu kan sawi, a hna thawh leh thil tihte kan hrereng dawn a, kan hnenah atan hmun a zawm zel ang," a ti.

Tun nipui bazar chhungin Roma hian player an chhuahtir nasa. Chris Smalling, Tammy Abraham, Romelu Lukaku, Andrea Belotti, Rui Patricio leh Leonardo Spinazzola te chu chhuak langsar zinga mi an ni.

Hetih lai hian season hmasa La Liga goal khung tam ber, goal 24 khungtu Artem Dovbyk chu Girona aṭangin an lalut a, mai nei loin defender tawnhriat nei tam Mats Hummels an la bawk, team an la inrem fuh thei rih lo.