Second round-ah Raducanu a lut

Tennis inelna Korea Open khelh mekah Emma Raducanu chuan second round a in hlangkai, a match hmasa berah Peyton Stearns chu darkar hnih leh minute 43 chhungin harsa angreng takin a paltlang a ni.

Seoul khawpuia inkhelah US Open champion hlui Raducanu hian 7-6 (7-4), 7-6 (7-5) in hnehna a chang - New York khawpuia beisei a phak loh hnua tournament a khelh lehna hmasa a ni a, atan result ṭha a ni ang.

Kum 21 mi Raducanu chuan, "Peyton hi player ṭha leh hlauhawm tak a ni. Ani paltlanga second round luh hi ka tan a hlu. Tun hnaiah match ka khel tam tawk lo, chuvangin ṭha taka khelh hi ka harsat ve ṭhin bawk," a ti.

Raducanu hian Europe aiin boruak a hnawngin a lum a tih thu a sawi bawk a, a match lehpekah chuan world number 40 Yue Yuan a hmachhawn ang - Chinese star paltlang tur chuan a khelh ṭhat a ngai khawp ang.

Inkhel dangah Heather Watson erawh a chak lo - second round inkhelah kum 32 mi Watson hian Ukraine nula Marta Kostyuk chu 6-2, 6-2 a ngam loin a zinkawng a tawp a ni.