Juve mualah PSV an tlawm

Juventus chuan Champions League boruak an la ngam hle - Italian club ṭha hian an mikhual PSV Eindhoven chu 3-1 in an lo hneh a, nuamsa takin inelna bul an ṭan tia sawi theih a ni.

Thawhlehni zan Allianz Stadium-a inkhelah Old Lady tan hian Kenan Yildiz, Weston McKennie leh Nico Gonzalez te chuan goal khat ṭheuh an khung a, mikhual goal neih chhun hi hun tawp dawna Ismael Saibari khung a ni thung.

Goal hmahruai khungtu Yildiz hi kum 19 mi chauh a la ni a, Juventus tan Champions League goal khung thei naupang ber ni tur hian box sir lamah ball a lalut a, amah vengtu paltlangin goal thlang lam kilah tak a thlawh lut.

Juve legend Alessandro Del Piero khan kum 20 leh ni 308 mi a nih lai khan Borussia Dortmund (September 13, 1995) lakah goal a lo khung tawh, Yildiz hian hun rei tak hnuah Del Piero-a record hi a rawn khum ta a ni.

Italian team ṭha Juve manager Thiago Motta chuan, "Champions League inelna bul kan ṭan fuh hi lawmna tur a ni, hun tawp dawna goal kan chhuah kha kan duh ang tak ni lo mah se, hun tam zawk kan khelh dan kha a lungawi thlak.

"Player tin an khel ṭha vek, chung zingah chuan Manuel Locatelli-a thawhrimna khan fak a phu a, Weston McKennie khan hmun hrang hrangah tha a thawh hlawk em em bawk," tiin a naute a fak hle.

Turin club hian tun hma lama an ropuina ang kha neih let tumin an bei mek - UCL bakah hian Serie A nomawi chu Inter Milan hnen aṭanga chhuhsak an tum dawn a ni a, hna a hautak chho dawn hle.