Porto-in Bayern Munich an barakhaih
Beiseina sang tak nena Porto va luhchhuah tumtu Bayern Munich chu Estadio do Dragao-ah an hawi hai a, mualneitu Porto lakah 3-1 in an tlawm. April 21 khian Allianz Arena-ah minute 90 dang an la inkhel leh dawn avangin Bayern hi an la tla bik lo.
Nilaini zan khan Champions League quarterfinal first leg khelh a ni a, German club ṭha in ngam loh an tawng a chu chu Porto winger Ricardo Quaresma a ni. Ani hian inkhel ṭan aṭanga minute 10 chhungin goal hnih a khung hman a, striker Jackson Martinez leh Thiago Alcantara ten goal khat ve ve an thun bawk.
Inkhel chu
Inkhel an ṭan chiah a Bayern innghahna ber pakhat goalkeeper Manuel Neuer a chesual nghal, box chhungah Porto striker Martinez a tih tluk avangin penalty a chawi a, yellow card pek zui a ni. Penalty pet tur hian Quaresma a rawn ding chhuak a, a hlah lo. Minute thumna lekah mualneituin 1-0 in hma an hruai nghal.
Bayern an awm mai mai bik lo, an nawr let ve nghal. Goal khungtu Quaresma bawk a langsar chhunzawm, mah se tun ṭum chu Bayern striker Robert Lewandowski laka a foul vang a ni thung. Freekick aṭanga ball lo kal hi Thomas Muller chuan Lewandowski ta a pe a, mahse Lewandowski hian a tauh over hlauh.
Quaresma bawk kan hmu chhunzawm leh, Bayern defender Dante tihsual vangin an goal hnihna a thun leh nghal. Minute 10 an inkhelh chuan Bayern in si hnih an phur der tawh. Porto-in bul an ṭan ṭha takzet a ni.
Bayern an talbuai chhunzawm dawna a lan laiin an tawnhriat ngah an chhawr a, an buai zui lutuk lem lo. Minute 28-naah midfielder Thiago Alcantara chuan Jerome Boateng cross ball chu goal-ah a chantir ve a, mahse sikhat an la phur tho. Team pahnih an fimkhur tawn a, goal luh belh tawh loin first half a tawp.
Second half an ṭan leh a mualneitu Porto bawk an hlauhawm leh nghal, Bayern chak lohna lai an hre fuh lak lawh tawh. An goal neihsa venhim aiin goal thun belh tumin an nawr zui leh a ni. Brazilian defender Alex Sandro chuan Colombia captain Martinez-a tan ball ṭha tak a siamsak a, Minute 65-naah Porto-in Martinez goal thun hmangin 3-1 in hma an hruai chhun zawm zel.
Bayern-in insiam ṭhat tumin ball an in pass kual vak vak a, mah se Porto tlarhnung an ṭhiat darh thei lo. Sebastian Rode-a'n goal khungna hun ṭha hmu mah se Porto goalkeeper Fabiano a paltlang thei lo, hun tawp dawnah defender Dante a tauh goal ngei tur nia lang chu Fabiano-a'n a lo dang leh bawk. Goal dang a lut tawh lo a, Portuguese club Porto-in German club Bayern 3-1 in an hneh.
Eng nge an sawi?
Porto manager Julen Lopetegui chuan, "Inkhel a la zo lo, hun chanve kan hman zawh dan hi a ṭha thawkhat hle. Bayern team awm tawh zawng zawng zinga a ṭha berte zinga mi kan hmachhawn a, kan dangchat thei a ni. Hei hian kan ṭhat tawk zia a lantir chiang hlein ka hria. Semifinal tleng tur chuan Munich-ah tihsual nei lo a kan khelh a ṭul ang," tiin a ṭawng fimkhur hle.
Bayern Munich manager Pep Guardiola chuan, "Porto kha team ṭha an ni tih ka hriat lawk avangin kan result hian min barakhaih lutuk lem lo, kan khelmualah kan la khelh ve leh dawn avangin lungngaih lutuk tur ala ni lo e. Kan inkhelh leh tur inbuatsaih nan ni ruk hun kan nei dawn a, chu chu a ṭha thei ang bera hman kan tum ang. Kan theih tawp tak meuh meuh kan chhuah a ṭul tawh dawn a ni," tiin a sawi.