Mizoram Super League BCA-in final an lut thei dawn em?

Vawiin tlai dar 4:00-ah Samsung 3:16 Plan Solution Mizoram Super League inkhel hmuhnawm hmuh tur a awm dawn a, final lut tura vawi khat chiah chak mamawh tawh Zarkawt BCA leh beisei tur nei tawh lo Mission Veng Vikings te an inkhel dawn.

Nizana Chaltlang Ryders nena inkhel Khatla TBL-in final an lut chiang tawh a, final an khelhpui tur erawh a la chiang lo. Team panga la bang ziangah Tuikual South leh Zarkawt BCA te'n final luhna chance an la nei ve ve a, BCA dinhmun erawh a duhawm zawk.

Tuikual South-in final lut turin vawi hnih inkhelh hmabak an la neihah chak ve ve an mamawh laiin BCA erawh vawi khat chak an tan a tawk. Vawiin tlaiah an chak loh hlauha Tuikual South an chak chuan BCA tan an match hnuhnung berah pressure a sang dawn tihna a ni a, match tawp berah hlauthawng leh hah taka khelh ai chuan vawiin tlaia chak mai hi an tan a hahdamthlak zawk ang.

Team pahnih hi March 13 khan lo inkhel tawhin Vikings aiin BCA an chungnung zawk. An inkhelh hmasakah hian 77-64 in Zarkawt BCA in hnehna an chang a ni. Mission Veng Vikings-in final luh beiseina an neih tawh loh vang ngawtin chak loh nawn an duh dawn lo a, chak ngei tumin an khel ang.