Jurgen Klopp: Khawi lam nge a pan dawn?

Nilaini khan Borussia Dortmund manager hlawhtling Jurgen Klopp-a'n a team enkawl lai chu season tawpah a chhuahsan tur thu a tichiang a, football khawvel titi luahtu ber a ni nghal.

Kum 47-a upa German coach ropui hian Dortmund a enkawl hmain player anga a khelh ṭhinnna Mainz 05 manager hna kum 2011-2008 chhung khan a thawk a, Bundesliga la khel ngai reng reng lo kha German league sang berah inhlankaipuiin 2005-06 ah Mainz chanchina a vawi khat nan UEFA Cup-a khelh pui bawk.

Klopp tak tak kan hmuhna erawh kum 2008 season tawpa Mainz a chhuahsan hnua club ropui Champions League te hial pawh lo chawi tawh, mah se tlakchhiat lam pan mek Dortmund a enkawl khan a ni. A enkawl ṭan tirh a Bundesliga-a 13 na ni pha ṭawk team kha Europe team ṭha ber pawlah kum rei lo teah a chhuah leh thei a, Bundesliga title pahnih - kum 2011 leh 2012-ah te a kum zawnin a chawi pui a, kum 2013-ah Champions League final a hruai thleng bawk. A cup chawi ringawt pawh hi insawitheih pui tham a ni a, DFB Pokal 2012 leh DFL Supercup 2008, 2013 leh 2014 ah te khan an champion.

Mario Gotze, Mats Hummels, Robert Lewandowski, Shinji Kagawa, Jakub Blaszczykowski leh Marco Reus te ho hrual liantu Klopp-a'n Dortmund a chhuahsan dawn takah chuan a club enkawl tur media ho chuan an inrinsiak leh nasa tawh hle a, amah berin, "Chawlh lak ka la tum lo," a tih vangin season tharah hian team engemaw ber chu a enkawl dawn tih a chiang. Klopp nen a an sawi zawm team langsar zingah Manchester City, Liverpool, Real Madrid leh Barcelona te hming meuh pawh a ri chhuak hial.

Premier League-ah

Klopp kan hmu dawn em?

Nikum November thla khan Klopp chuan, "Germany ka chhuahsan dawn a nih chuan England ka pan ka ring. Ka tan chuan chona thar hmachhawn tura England pan hi a châkawm ber, an ṭawng pawh tlem a zawng ka thiamsa a, coach hlawhtling ni tur chuan ṭawng thiam hi a pawimawh hle a ni," tiin England pan a châk thu a lo sawi daih tawh. Mahse, Klopp hi Europe coach ṭha ber pawl a nih avangin club lian lo chu a pan a rinawm loh.

Premier League club lian pali Liverpool, Arsenal, Manchester City leh Manchester United te'n tun hmain Klopp hi lakluh tumin an lo rim vek tawh a, an hlawhchham vek. German coach of the year vawi hnih ni thei hi season tawpah a awl dawn tih a chiang ta si a, Premier League club lian ho hian an rim leh mai ang em? tih chu zawhna awm thei a ni ta.

Manchester City hian season bul ṭan ṭha viau mah se tunhnaiah Manuel Pellegrini hnuaiah an che ṭha tawk lo a, kar hmasa a United nen an inkhelh ṭumin United fan-te chuan Pellegrini chu, "Naktukah an ban dawn che," tiin an au el hial. Pellegrini dinhmun a derthawng a, City lamin an ban a nih ngat chuan season tharah Klopp-a hmel Etihad Stadium-ah kan hmu lo ang tih a sawi theih loh. Amaherawhchu City leh Chelsea te'n Manuel Pellegrini leh Jose Mourinho coach atan an rawih hmaa Klopp an rim lai khan German coach hian, "Team enkawl turin sum tam tak ka mamawh lo. Sum tam lutuk hi chu buaina thlentu mai a ni a, he buaina hi keichuan ka duh lo a ni," tiin sum ringawt a um loh thu a lo sawi tawh.

Manchester United in David Moyes an ban dawn khan Klopp hming hi lam rik a ni a, mahse Dortmund coach hian a team enkawl lai chu kalsan thei a nih lo thu a lo sawi tawh. Tunah a chhuak dawn ta si a, United hi a pan mai ang em? Louis Van Gaal hnuaiah season ṭan tir lamah che ṭha lo mahse United in an zia an chhuah leh mek tawh a, tuna an khelh ang renga an khel a nih chuan LVG hi an banin a rinawm loh a, Klopp-a hmel Old Trafford-a kan hmuh leh hmuh loh chu United result-ah a innghat thui hle ang.

Kum 2012-a Kenny Dalglish-a'n Liverpool a chhuahsan khan Reds neitu Fenway Sports Group te chuan Klopp hi an lo hmu tai daih tawh. Mahse, Dortmund-ah Klopp-a'n a vanglai a hman lai a nih vangin Anfield a pan duh lo. Season hmasa Premier League-ah teuh deuhin Liverpool an champion lo a, tun season-ah erawh Champions League khelh phak leh phak lohah an buai mek. Champions League an khel pha lo a nih ngat chuan Liverpool-in Klopp hi an rim nawn leh a nih pawhin mak ti suh.

Arsenal-in kum 1996 aṭanga an coach lo ni tawh Arsene Wenger thlak an sawi apianga hming ri ring ber pawl ni ziah chu Klopp hi a ni. Dortmund coach pawh hian Arsenal khelh dan hi a duhzawng tak a nih thu zep loin a lo sawi lang tawh ṭhin. Mahse, tunhnaia Arsenal chet ṭhat dan en chuan an coach kumhlun Wenger hi an thlak mai a la rinawm rih lo hle.

Premier League club dang zingah West Ham leh Newcastle United te chu season thara manager thar zawng tura beisei an ni a, mahse Klopp te ang manager ropui meuh lalut tur chuan an tlin kher lo ang.

La Liga pan ta se...

Premier League ai maha Klopp-a'n a pan mai an beisei zawk chu Spanish La Liga a ni. Klopp-a'n La Liga lam a pan media tam zawkin an rin chhan hi engdang vang ni loin team lian pahnih Barcelona leh Real Madrid te manager dinhmuh hi a derthawng ve ve nia sawi a nih vang a ni. Real-in coach an thlak ngun zia kan hria a, an Italian coach ropui Carlo Ancelotti meuh pawh an ban leh ṭep tawh nia sawi a nih avangin Klopp-a'n Madrid khawpui a panna chance hi a sang hle.

Luis Enrique-a'n an inkhel hnuhnung 22-ah vawi 20 a naute chakpui mah se rei lote Catalan club a enkawl chhungin player-te nen neuh neuh an ngah em avangin Barcelona-a a dinhmun hi a derthawng hle nia sawi a ni. Season tharah Klopp-a'n Messi, Suarez leh Neymar te ho a enkawl thei tlat.

Atletico Madrid hi Spanish club zinga Real leh Barca tih lohah chuan Klopp lalut thei tur awmchhun an ni ang. Mahse, an coach Diego Simeone hian a chet ṭhat pui rih viau bakah kum nga cham turin contract thar a ziak zo chiah a, Atletico hi chu a pan a rinawm loh.

Italy-ah Klopp tan hmun a awm em?

Serie A club lian Klopp rim ngam tur chin chu Juventus leh Inter Milan te an nih mai hmel. Massimiliano Allegri hnuaiah Juventus an khel ṭha tluang a, coach thar Roberto Mancini hnuaih Inter Milan-in hma an sawn hle bawk. Chuvangin Serie A team lian pahnih hian Klopp an rimin a rinawm loh a, Inzaghi hnuaia che chhe em em mai AC Milan hian thawm an rawn nei na viau a nih erawh chuan a awm lo hran lo ang.