Lyon-in hma an hruai leh ta

French Ligue 1 in­khelhah Lyon chuan an mikhual Bastia chu 2-0 a hnehin League-ah Paris St-Germain lehpelin hma­hruaitu an ni leh tawh a, champion tura an din­hmun an siam rem mek zelin PSG nomawi kawl lai chu chhuhsak an tum hle.

Hubert Fournier a naute hian point hnihin PSG an lehpel leh ta a, mahse match khatin an khel tam zawk thung. League match ruk khelh tur la awmah champion tum inum biruak a sosang chho hle a, Lyon hian match 32 khelh tawh aṭangin point 64 an hlawhchhuak tawh a ni.

Nialini zan inkhelah hian first half-ah goal a lut lo a, second hlaf-ah goal hnih a lut thung. Lyon midfielder Clement Grenier ball cross Bastia defender ten an pet chhuah mai loh chu Mohamed Yattara-a'n nangchingin minute 77-naah an hmahruaina goal a thun. Hun tawp hma minute nga chauh a awm tawh tihin captain Captain Alexandre Lacazette chuan an chakna tichiang turin an goal hnihna a khung a, ani hian tun season French Ligue 1-ah goal 25 a khung tawh a ni.

Tun hnaiah Bastia hi an che ṭha lo hle a, an game hnuhnung pali aṭangin point khat chauh an hlawhchhuak thei a, table-ah 14-na an ni mek. Relagation zone aṭangin point hnih chauhin an him rih a ni. Kum thara French Ligue 1 khel chhunzawm tur chuan an insiam ṭhat hle a ngai ang.

Pahnihna PSG hian Champions League quar­ter final-ah first leg-ah Barcelona chu 3-1 in an hneh lo a, April 28-a Metz nen League match an khelh leh turah boruak sang tak hnuaiah an khelh a ngai tawh ang.