Hmasawn in beisei Lorenzo

Kuminah MotoGP ṭum hnih intlansiak neih tawh a ni a, ṭum hnih champion ni tawh Yamaha rider Jorge Lorenzo-a'n beisei ala phak lo. Tunkar tawp a Argentine Grand Prix an tlan turah hmasawn ngei a in beisei thu a sawi.

Intlansiak hmasa ber Qatar Grand Prix-ah khan Lorenzo hi palina a ni pha chauh a, a vawihnihna Grand Prix of the Americas-ah pawh khan ngaiawhin palinaah bawk a thleng leh a ni. Tun Pathianni a intlansiakah erawh chuan hmasawnin pathumna chinah a awm theih tawh ngei a beisei hle. Nikum khan he tlankawngah hian pathumna a lo ni tawh a ni.

Kum 27-a upa Spanish rider Lorenzo chuan, "Intlansiak hmasa pahnihnah palina ka ni ve ve a, tun ṭumah chuan hmasawn a hun tawh a ni. Kan team pumpuiin hmasawn kan mamawh, championship-ah pawh pangana kan ni mek a, hei hi kan awmna tur hmun a ni lo. He ai a sanga awm tur kan ni. US-ah khan khawsik vangin harsatna tlem ka nei a, Argentina-ah erawh harsatna neilo a ka inbuatsaih theih dawn avangin beiseina kan nei sang hle," tiin a sawi.