Gerrard-a'n United a hmachhawn leh maithei
Liverpool captain ropui Steven Gerrard chuan tun nipui hian a club huat em em Manchester United hmachhawnna hun ṭha a nei leh thei dawn. July 11 leh August 5 inkara khelh tur International Champions Cup-ah Chelsea leh Manchester United an inlan dawn a, Gerrard-a club thar tur LA Galaxy pawh pre-season tournament-ah hian an khel ve dawn a ni.
Team a chawh phur thiam em avanga 'Captain Fantastic' tia a hminglem an vuahsak Gerrard hian kum 26 lai a lo awm tawhna leh amah siam liantu Liverpool chu chhuahsanin season tharah hian MLS club LA Galaxy a zawm dawn a ni. Gerrard hian Anfield-a a hun hnuhnung lamah thla hmasa khan Premier League-a Manchester United a hmachhawn hnuhnung berah substitue bench aṭangin a rawn tlan lut a, mahse khelmualah second 38 chiah a awm hman tihin Ander Herera a rah luih vangin hnawhchhuah a ni.
International Champions Cup-ah hian Premier League club Manchester United leh Chelsea bakah La Liga hmahruaitu Barcelona, French club lian Paris Saint-Germain, Potuguese club FC Porto leh Italian club Fiorentina te an inlan dawn bawk a ni. MLS team zingah Gerrard-a khelhna tur LA Galaxy bakah New York Red Bulls leh San Jose Earthquakes te an inlan annga , Mexican club lian America pawh an tel dawn bawk a ni.