Arsenal leh Chelsea inkhel tur ticket man a to

Tunhnaiah Arsenal an rawn khelh ṭhat chhoh em avangin Premier League champion an sawi ri ngam ve leh ta a, April 26-a Premier League hmahruaitu Chelsea nen London derby an khelh tur pawn ngaihven a hlawh phah hle.

English team lian pahnih inkhel tur ticket hi official a zawrhchhuah tawh niin internet lamah pawh website hrang hrang in black in an zuar chhuak nasa hle a, Arsenal official website-ah category A ticket man (club lian an tum dawn a ticket man ) hi pound 97 (Rs. 8,918) te a nih laiin website ṭhenkhat chuan Chelsea fan te ṭhutna tur ticket man hi pound 950 (Rs. 87, 344) te'n an zuar chhuak a, Arsenal fan ṭhutna lama ticket chu pound 712.5 (Rs. 65, 508)te'n an zuar chhuak thung. A man pangai aia a sanna zat hi 700% zet a ni.

Arsenal hi Premier League club zinga ticket zuar to ber an ni hrim hrim a, tuna an zawrh dan erawh black a nih vangin Arsenal ticket man pangai awm sa chu a khum chiang hle a ni.

Premier League-ah Arsenal hi pahnihna ni mekin khelh khata khel tlem zawk hmahruaitu Chelsea chu point sarih in an phak lo mek.