Laureus Sports Academy-ah Sachin

India cricketer ropui Sachin Tendulkar chu Nilaini khan Laureus Sports Academy-ah lakluh a ni. Laureus Sports Academy hi infiamna lama mi hmingṭha leh ropui te an lakluhna a ni a, Sachin hi indian zingah Kapil Dev leh Rahul Dravid te dawta he chawimawina dawng leh thei hmasa ber a ni.

Kumin LSA-a an lakluh thar zingah hian Sachin bakah Chinese basketball player ropui chawl ta Yao Ming, intlansiak lam ti mi Tegla Loroupe, Chinese gymnast Li Xiaopeng leh Chinese short track speed skater Yang Yang te lakluh an ni.

Karleh maia kum 42 tling tur Tendulkar chuan, "Helai hmuna din hi ka tan chuan chawi­mawina ropui tak a ni a, Laureus Academy member ka ni ve ta mai hi ka tan chuan a hlu a, ka ngaihsan em em ṭhin te nen huang khatah dah kan ni ang tih hi ka lo suangtuah ngai lo" a ti.

Kum 24 cricket a khelh chhunga batsman in record a siam theih ang zawng zawng deuh thaw siamtu Sachin chuan, "India rama mipui tam zawk hi kum 25 hnuailam an ni a, tunhnaiah sports hmasawnna kan hmu nasa hle. Ka Indian pui kum naupang zawk te hnenah hlawhtling ngei tura an theihtawp chhuah zel turin ka chah duh a ni," tiin Indian ṭhalai te chu a fuih.

Khawvela cricketer ropui ber ang hiala an sawi ṭhin Sachin hian kum 24 cricket a khelh chhungin ODI match vawi 463 khelin run 18,426 a vawchhuak a, match khat zela run 44.83 siam ang a ni. Test match bawi 194 a khelhah run 15,645 a vawchhuak bawk a, match khat zela run 54.32 vawchhuak ang a ni.

Test match bikah Sachin hian century vawi 51 hlap­chhuakin half-century vawi 66 a hlapchhuak thung. ODI match-ah half century vawi 96 a vawchhuak a, century vawi 49 a vawchhuak a ni. Sachin hian double century vawikhat a hlapchhuak bawk a, cricketer zinga run 200 match khata vawchhuak thei hmasa ber a ni.

Kum 1989-a Pakistan laka a ODI match hmasa ber khel tu Sachin hian kum 2013 Asia Cup zawhah khan International match-a century vawi 100 hlapchhuak chungin cricket a chawlhsan ta a ni.