Sherwood-a'n inrintawkna min neih tir - Benteke

Aston Villa striker Christian Benteke chuan an manager thar Tim Sherwood chuan inrintawkna a pek thu leh an team pumpui pawhin an inrintawk phah thu a sawi.

Tottenham manager hlui Sherwood hian February khan Villa Park hi a pan a, hetih laia Aston Villa din­hmun hi a chhe hle. Mahse, tunlai hian Sherwood a enkawlna hnuaiah Villa in hma an sawn a, Premier League-ah point rukin relegation zone an hlat tawh bakah FA Cup semi final an inhlangkai tawh bawk. Pathianni khian Wembley stadium-ah Liverpool nen final luh inchhuhin an inkhel ang.

Tun hnaiah striker Benteke hi a kheṭ ṭha hle a, Premier League match a khelh hnuhnung paruk aṭangin goal riat lai a khung a ni.

Villa striker Christian Benteke chuan, "Kan hnena a rawn kal hmasak ber ni khan hlau lo leh inrintawkna nena inkhel turin min fuih ngahl a ni. Amah a inrintawk bakah palyer ten kan zawm turin thu a sawi thian em avangin keini ang tawnhriat ngah lo awm khawm tan chuan a pawimawh hle a ni," tiin an manager thusawi thiam zia a sawi.

Sawi chhunzawmin Benteke chuan, "Tunah chuan nuam ti takin kan inkhel thei tawh a, hlau leh khur chung kha chuan chak result kan hlawhchhuak thei ṭhin lo a ni. Pathianniah pawh hian inrintawkna sang tak nen Liverpool kan hmachhawn theih dawn avangin final kan thlen theih ngei ka beisei," tiin FA Cup final an luh ngei a beisei thu a sawi bawk.