I League Second Division Siliguri-ah Aizawl FC aiin Chanmari FC an huai zawk

Nimin khan Siliguri-ah Chanmari FC-in hmahruaitu Aizawl FC chu 3-2 in an hneh a, match sarihnaah Aizawl FC chak kal tluang a tawp.

I League Second Division Phase 1 kharna inkhelah Aizawl FC chak lo mah se point 18 hmuin hmahruaitu an ni chhunzawm zel.Chanmari FC erawh point 14 hmuin Lonestar Kashmir hnuaiah an awm.

Kanchenjunga Sta­dium-a 'MPL3 final Rematch-ah' Aizawl FC-in Albert Zohmingmawia goal hmangin minute 18-naah hma an hruai a, Liberian forward Alfred Kemah Jaryan leh captain David Lalrinmuana-te thawhrah a ni.

Chanmari FC-in Mal­sawmfela freekick hmangin minute khat hnuah an si­phurh an sut nghal a; Ram­hlun South tlangval hian Aizawl FC keeper Zothan­mawia position fuh tawk lo chu a hmang ṭangkai thiam hle.

Second half ṭan aṭanga minute lina lekah Sawmfela'n midfield laia H. Lalbiakthanga ball a chhhuhsak hnuah ṭha taka lalutin, Chanmari hmahruaina goal a khung.

Minute 52-naah Nigerian forward Joel Sunday-a'n Chanmari goal thumna a khung. Aizawl FC-in an si phurh sut ngei tumin Justice Morgan an luhtir a, Nigerian forward hian minute 70-naah goal khung mah se goal dang a luh belh lo. Chanmari FC 3-2 in an chak.

Chanmari FC hian match thum chak an neih loh hnuah match zawng zawnga la chak vek Aizawl FC chu inkhel thunun chungin an hneh.

Vawi khat inkhelh kual zawha tawp tur chu nise Aizawl FC hi I League khel tur an ni a; khelh sarih hmabak la awmah an dinhmun a la duhawm zel. Chanmari FC hi Siliguri-a an match hnuhnung bera an chak avangin beiseina an nei thar bawk.

Chanmari lawmna belhchhahtu chu MPL lama an catain Ricky Lallawmawma a dam leh tawh a, a game hmasa ber a khel. An chak theih lohlaia inhliam Lalruatthar a lo kir bawk a, hrem tawk captain Lalrinchhana a khel leh thei ta bawk.

Aizawl is blue

Internet lamah Chanmari FC ṭantute an hmai a uang hle. Chanmari fans lamin 'AIZAWL IS BLUE' tih thupui a hmang. State pawna tawnhriat ngah zawk Aizawl FC-in state pawna hmel thar Chanmari FC an an hneh lo tlat.

Thlirna dang aṭanga en chuan tuna Mizo club-te Siliguri an chet dan hi a lawmawm hle. Club pahnih hian 'match fixing' lam an buaipui lo tih chiang a, chu chu ruka insiamrem ching India ram club dang-te tana entawn tur an hnutchhiah chu a ni.

Eng nge an sawi?

Aizawl FC coach K. Malsawmkima chuan, "Kan hneh lo hrim hrim a ni. Chak reng kan duh a, kan chak tak loah chuan kan dinhmun hi a la ṭha thoah kan ngai. Theihtawp kan chhuah anga, Pathian zarah I League khelh theih ngei hi kan la inbeisei tlat a ni," tiin a sawi.

Aizawl FC hian MPL3 best player Lalramchullova inhliam vangin an chhawr thei lo a, a tel lo hi Mala hian chak loh chhuanlamah a hmang lo.

Chanmari FC coach H. Vanlalthlanga chuan, "A tir game thum kha kan khel ṭha. A hnu lamah kha chuan squad kan neih chhah tawk loh kan tuar a, player inhliam vangin kan tlar hnung a pan hle. Tunah chuan ngai kan awh chho leh tawh a, result ṭha zawk kan neih zel ka beisei," tiin I League khelh phak an la inbeisei thu a sawi.