Mizoram beiseina titawp theitu Lonestar

Santosh Trophy leh National Games-ah Mizoram an champion tawh. Mizoram football hmabak chu I League club neih a ni a, kumin Mizoram club tan hun ṭha a ni a, beiseina titawp theitu chu Lonestar Kashmir FC an ni.

Jammu and Kashmir club Lonestar hian nimin khan United SC 4-0 in an sawp a, Chanmari FC hnehtu Lonestar hi Aizawl FC aiin point hnih chiahin an hniam. Nimin inkhelah Lonestar tan Christopher Chizoba-a'n goal hnih a khung bakah Ajay Singh leh Jagpreet Singh-te'n goal khat ve ve an khung bawk.

Lonestar tan kumin second division hi an vawi khat telna ni mah se player tawnhriat nei ṭha, I League pawh khel tawh ṭhahnem tak an lak khawm avangin tling tura rinkai an ni. Anni hi Aizawl FC leh Chanmari FC-te I League kalkawng dal theitu an ni.

Inkhel dangah I League khel pha thei tura rinkai Mohammedan Sporting chu Hindustan lakah an chesual a, minute 84-naa Nitin Rawat-a goal hmangin Delhi club hi an chak. Kolkata club hian point 10 chiah an la hmu a, hmahruaitu Aizawl FC nena an inkarah point riat lai a awm avangin I League khelhna chance a tlem tawh hle.

Kenkre-in match sarihnaah Manash Sarkar, Taha Kachwala leh Arvindraj Rajan-te goal hmangin PIFA 3-0 in an sawp a, table mawngphah an chhuahsan.