PSG ngam loh Luis Suarez
Paris-ah Barcelona-in harsatna an nei lo, Neymar leh Luis Suarez goal hnih hmangin Paris St Germain 3-1 in an hneh. April 21 zan khian Nou Camp-ah UEFA Champions League quarterfinal second leg an khel leh ang.
Parc des Princes-ah PSG record duhawm tak tih tawpin a awm. Barcelona laka an tlawm hma hian PSG-in European competition an khelmuala khelhah match 33 chhung hneh loh an tawng tawh lo.
Nilaini zan inkhelah Neymar-a'n minute 18-naah Barca goal hmahruai a khung a, Lionel Messi siam sak a ni. Brazilian forward hian tun season-a inelna hrang hrangah goal 28 a khung tawh a, chung zinga goal 12 chu Messi siam sak a ni. Argentine forward hian Neymar goal khung hma hian goal ban a pet per bawk; season liamta khan Messi hian Neymar goal khung tur vawi khatmah a siam sak lo.
Goal luh hnuah PSG captain Thiago Silva chu inhliam vangin lakchhuah a ni a, PSG tlar hnung a nem phah. Second half-ah Uruguayan forward Suarez-a'n remchangah hmangin Silva aia lut David Luiz-a kap kara a khung hnuah player pahnih paltlang lehin minute 67-naah goal ropui a khung.
Minute 79-naah Suarez hian a ṭum hnih nan Luiz-a kap karah khung lehin chiang takin goal hnihna a pet lut a, keeper Salvatore Sirigu tan dan rual a ni lo. PSG-in French defender Jeremy Mathieu hmangin beiseina an nei a, minute 82-naah Barca defender hian an lamah a ti lut a, 3-1 in inkhel a tawp.
Second leg-ah PSG-in Zlatan Ibrahimovic an chhawr thei tawh dawn a, Swedish forward hi inelna hnuhnung pasariha goal 13 khung thei a ni.
Suarez an fak
West Brom leh Cardiff striker Robert Earnsaw chuan, "Suarez hi khawvel striker zinga sangha nula (mermaid) kap kara ball khung thei awmchhun a ni," a ti. Sangha nula hian ke a nei lo a, Earnsaw sawi tum ber chu Suarez-a thiam zia a ni.
English striker ropui Gary Linekar chuan, "Thil mak a ni. Suarez-a zahna lantir nan a hmaah kan kun e," tiin Twitter-ah a ziak.
Liverpool legend Jamie Carragher chuan, "Luis Suarez hi ka hria a, ka khelh pui tawh. Nakinah chuan ka tute bulah ka khelh pui tawh thu hi inchhuang takin ka la hrilh ang," a ti.
Goal hnih khungtu Suarez chuan, "Kan theihna zawng zawngin kan khel a, team pahnih kan inthlau lo a, kan danglamna chu anni aiin kan fing zawk a ni," tiin a sawi.
Eng nge an sawi?
Barcelona manager Luis Enrique chuan, "Football-ah hian thil mak tak tak a thleng tawh ṭhin a, kan chak chiang tawha kan ngai a nih chuan kan tisual khawp ang. Nou Camp-ah chak loh hlau miah loin an rawn kal dawn a, khelhpui an har khawp ang," tiin an la chak chian loh thu a sawi.
Inkhel chungchang sawi zuiin Enrique chuan, "Kan khel ṭha a, player mala fak ka tum lo. Tlar hma leh hnung lamah kan khel ṭha em em a, kan khelh dan khan kan khelh leh zelna turah phurna minpe a ni," tiin an khelh dana a lungawi thu a sawi.
PSG manager Laurent Blanc chuan, "Nou Camp kan tlawh hunah chuan tun aia kan dam ṭhat ngei ka beisei. Barcelona khan inkhel an thunun a, ball chang tumin kan khingpui player-te kha kan um a ni ber. Barca hmachhawn turin kan inpeih tawk lo a, chak phu zawk an ni," tiin a sawi.
PSG defender Luiz kha malpui hliam mah se Thiago Silva inhliam vangin a luh ngei a ṭul a. Ani bakah hian Zlatan Ibrahimovic, Marco Verratti leh Thiago Motta te an chhawr thei lo.