Atletico jersey nena goal hnih khungtu Suarez Messi hoin Barcelona an chak

Pathianni zan La Liga inkhel chanchin a ngaihnawm a, Barcelona-in an mamawh tawh lo nia an inhriat avanga an chhuahtir Luis Suarez chuan Atletico Madrid tana a match hmasa berah goal hnih a khung nghal!

Atletico Madrid hian an mikhual Granada chu 6-1 ngawtin an lo sawp a, Suarez bakah hian Diego Costa, Angel Correa, Joao Felix  leh Marcos Llorente te chuan goal khat ṭheuh an khung ve bawk.

Suarez-a ropui zanah Barcelona-in Uruguayan striker ngaia an fan-te an ṭah loh nan goal khung an harsat lo tih an pholang chhunzawm ve nghal a, tun season La Liga a an match hmasa berah Villarreal chu 4-0 in an sawp. 

Barcelona tan Lionel Messi chuan penalty aṭangin goal khat a khung a, Ansu Fati chuan goal hnih khungin goal khung pui mamawh lo Barca tan Villarreal centre back Pau Torres chuan an lamah a ti lut palh bawk. 

Atletico-in Luis Suarez luh hma pawhin Granada lakah inkhel an thunun sa a, kum hnih chhung Madrid khaw club tana khel tura contract ziaktu striker hi bench lamah bul ṭantir a ni. 

Mualneitu team tan hian Costa chuan minute 9-naah goal hmahruai a rawn khung a, second half lamah Correa, Felix  leh Llorente ten an chhunzawm a, Llorente goal khung hi khelmuala minute hnih chiah hun la hmang Suarez-a siamsak a ni. 

Kum 33 mi Suarez-a'n goal siamsaktu chauh nih duh loin minute 85-naah goal a khung ve zui a, Granada tan Jorge Molina chuan minute hnih hnu lawkah rawn khung ve zauh mah se Suarez bawk hian hun pek belhah chak nem nghehna goal a khung. 

Suarez-a'n a club thar tan record siam nghalin Atletico tana match hmasa bera goal hnih khung nghal thei awmchhun a ni a, kum 2000 hnua Atletico tana La Liga match hmasa bera goal leh assist nei kawp thei hmasa ber a ni bawk. 

Suarez-a'n Atletico a pan dawn tih a chian khan rilruah amah ang thoa 'sual' tih theih Diego Costa mitthlaah a lo lang nghal a, engti hawi zawnga chak duh tia an sawi ṭhin Diego Simeone chu an coach a la ni zui. 

Simeone hnuaia player pahnih inkhel tur hi mi tam tak hmuh châk a ni a, Costa thlak turin Suarez hi a rawn tlan lut. Spain international Costa chuan, "Player ṭha tak a ni. Pakhatin midang lo tihbuaichu ka thei mai ang a, pakhatin a lo seh ve dawn bawk a ni," a ti!

Suarez hian World Cup 2014-ah khan Italy nen an inkhelh ṭumin Italian defender Giorgio Chiellini chu a darah a lo seh tawh a, Liverpool tana a khelh laiin hetihlaia Chelsea defender Branislav Ivanovic banah a seh bawk. 

Barcelona a kum ruk a khelh chhunga match 283 a inlana goal 198 khungtu Suarez chuan, "A chang chuan thil thlak danglam hi player tan a ṭangkai ve ṭhin. Lawm taka min lo pawmtu club lamah ka kal a, chu chu khelmualah khan hmuh theihin a awm a ni," a ti a, Atletico-ah a hlim thu a sawi. 

Ronald Koeman enkawlna hnuaia competitive match hmasa ber an khelhah Barcalona tak tak kan hmu leh ta a, rawlthar duhawm Ansu Fati chuan Suarez hmun ruak hnawh khat turin a ṭha tawk tih pholangin goal hnih a khung. 

Fati hian minute 15-naah goal hmahruai a khung a, minute li hnuah goal hnihna a khung zui - a goal hnihna hi season hmasaa loan a an chhuahtir Philippe Coutinho siamsak a ni a, Brazilian midfielder hian Koeman hnuaiah chuan hmun pawimawh a chang chho dawn niin a lang. 

Kum 17 mi Fati hian goal hnih a khung hnuah pawh a duhtawk mai lo a, minute 35-naah penalty a hlawh chhuak bawk - Messi chuan he penalty hi goal-ah a chantir a, Barca fans tan hmuh nuam a tling ang. 

Barca an chak dawn tih a chiang hma a, Arsenal boss hlui Unai Emery enkawlna hnuaia khel Villarreal-in tih theih an nei tam lo - minute 45-naah  Pau Torres chuan an lamah a ti lut zui a, 4-0 in Barca an chak. 

Nipui transfer laiin Messi-a'n Barcelona hotute hnenah chhuah dilna lehkha a theh lut a, amah siam liantu club hi court a khin a duh loh avang chauhin Catalan club-ah hian a cham.

Pathianni zanah Koeman-a'n 4-2-3-1 formation hmangin Messi chu tlarhmaah a awm a, mual ding leh sira duhthala tal turin zalenna pek a ni bawk - kum 33 mi Messi hian vawi sarih shot a nei a,  Sergio Asenjo tan hna a siamsak nual. 

Messi hian La Liga season 17 chhung goal khung thei zingah a hming a ziak kai a, Inrinni zana he record siamtu zinga tel thar Real Madrid captain Sergio Ramos hnung a zui - Barca tan hian nipui transfer a lakluh thar  Miralem Pjanic, Francisco Trincao leh Pedri chu bench aṭanga luhtir vek an ni bawk. 

Bayern Munich tana treble nomawi chawitu Coutinho pawh a nuam tihna hmun berah khelhtir a ni a, Messi hnung chiahah a ding - mual sirah Fati leh Antoine Griezmann an awm thung.