Ronaldo goal hnih a tawk lo

Cristiano Ronaldo-a'n goal hnih khung mah se Juventus chak nan a tawk zo lo a, an khingpui AS Roma goal hnih neih sa sut zawhna tawk chauh a ni. Old Lady hi an mikhualna ramah Roma nen 2-2 in an inhnehtawk.

Pathianni zan Serie A inkhelah mualneitu Roma an khel ṭha, chawlhlawk hmain Jordan Veretout-a'n goal hnih a khung, a goal hnuhnung zawk hi Arsenal midfielder hlui Henrikh Mkhitaryan siamsak a ni.

Inkhel chawhnu lamah Ronaldo-a'n penalty hmangin si phurh a sut ṭhen a, beiseina nei sang viau mah se Juve midfielder Adrien Rabiot chu minute 62-naah yellow card vawi hnihna hmuh vangin an hnawt chhuak.

Player 10 a khel Juve tan kawng a hautak tawh, an kim loh aṭanga minute sarih hnuah Portuguese forward bawkin sang taka zuang chungin an goal hnihna a tauh lut a, a hnu lamah erawh goal dang a lut zui tawh lo.

Andrea Pirlo-a'n manager a nih hnua a match hmasa berah Sampdoria 3-0 in an hneh a, a vawi hnihnaah erawh an duh ang reuslt an hlawh chhuak zo ta lo. Match hnih khelh chinah point li hmuin palina dinhmun an luah.

Juve manager Pirlo chuan, "Roma khan na tak maiin a huhoin min nawr ṭhin a, a nihna takah chuan inven dan kha kan hre mai lo a ni. Kan insiamrem hnuah erawh hma kan sawn, a bik takin Ronaldo khan goal khung tumin a beih nasat dan kha fak a phu," a ti.

Inkhel dangah AC Milan chuan Crotone 2-0 in an hneh, striker Zlatan Ibrahimovic inlan theih loh zanah Franck Kessi-a'n penalty a khung a, Brahim Diaz chuan an goal hnihna a khung bawk. Stefano Pioli naute hian match hnih an khelh chinah point ruk an hmu.