Mizoram Super League Khatla chelh thei an la awm lo

Samsung 3:16 Plan Solution Mizoram Super League-ah final lut chiang tawh sa Khatla TBL chelh thei an la awm lo a, Ningani zan dar 8:00 khan MSL hmahruaitu Khatla hian a mawngphaha awm mek Chaltlang Ryders chu 86-80 in an hneh hram a ni.

Hawla Indoor sta­dium-a inkhelah hian beisei angin mipui an tam tawk lo a, Khatla fan-te an team-in final an luh chian tawh avangin an ngaih a ngam tawh niin a lang. Inkhel boruak erawh a ṭan loh phah lo a, team pahnih in chak lo zawk nih an tum lo ve ve. Khatla in chak vek chunga final khelh an tum tih a chiang a, final lut chiang tawh chungin an players ṭha te an awl mai mai lo. Chaltlang in a mawngphah chhuahsan tura chak ngei an tum thung a, an player ṭha nen an rawn dingchhuak.

Inkhel ṭan tir lamah beisei ang ngeiin Khatla TBL in inkhel an thunun nghal a, coach-cum-player H. Laldinsanga (mapuia) a hmuhnawm nghal hle. Mahse, 2nd quarter aṭangin Chaltlang Ryders in an theihna an pholang a, point 20 zet an rawn score a, mahse Khatla lamin 39-33 in hma an la hruai cheu. Team pahnih an in um chho zak zak a, 4th quarter-ah Chaltlang rawn che ṭha leh viau mah se inkhel bul an ṭan fuh loh an tuar a, 80-86 in a tlawm zawkah an ṭan a ngai ta a ni.

Khatla TBL in an khelh leh turah Zarkawt Serpents an la hmachhawn dawn a, an chak leh a nih chuan chak vek result nei chungin final an khel thei dawn. Inkhelh hnuhnung bera chak lo chunga final hmachhawn an duh lo ang. Chaltlang Ryders in Mission Veng Vikings chiah khelh tur an nei tawh a, an chak lo leh a nih chuan Mizoram Super League hmasa bera hniam ber an ni dawn.

Khatla TBL tan Mapuia bawk a hmuhnawm leh a, TBL final kalkawnga pawimawh em em mai Mapuia hian point 23 zet rawn score in rebound paruk a la a ni. Khatla TBL U18 player Jordan Lalchhanhima a khel chhe hran lo bawk.

Chaltlang Ryders tan dan pangngaiin Lalmuanpuia Zote chu an innghahna ber a rawn ni leh a, points 36 tehmeuh rawn score in rebounds pathum a la a, a team hnehna chanpui zo lo mah se hmuhnawm khawpin a rawn khel thei a ni.