PFA Player of the Year nominee an tichhuak

18th April, 2015

Professional Footballers' Association Player leh Young Player of the Year dawng thei tur hming chu Ningani khan chhawpchhuah a ni a, senior players ho aiin rawlthar player hming a langsar zawk.

Players chhawpchhuah zingah lawmman pahnih la thei turin Liverpool player duhawm leh ṭha Philippe Coutinho, Chelsea innghahna Belgian winger Eden Hazard, Manchester United mualpho tur vawi tam tak lo chhanhim tawhtu Spanish keeper David De Gea, tun season-a rin phak baka rawn che ṭha Tottenham Hotspurs striker Harry Kane te chu chhawpchhuah an ni a, an ni pali hi Player of the Year leh Young Player of the Year dawng thei turin an hming hi chhawpchhuah a ni.

Player of the Year dawng tur chhawpchhuah zingah player pali bakah hian Chelsea striker Diego Costa leh Arsenal player pawimawh Alexis Sanchez te hming a lang a ni.

Young player of the year dawng turin Liverpool rawlthar duhawm tun hnaia ruihhlo a zu lai thlalak a chhuah vanga mualpho em em Raheem Sterling leh Chelsea keeper rinrawl, Peter Cech meuh pawh nekchhuaktu Thibaut Courtois te chu midang pali bakah hian an rawn tel bawk a ni.

Men's Players' Player of the Year shortlist

Diego Costa (Chelsea): Atletico Madrid aṭanga Stamford Bridge pan tu hi a season hmasa berah a tlangnel nghal a, Chelsea hmahruaina tura an player thawhhlawk ber pawl niin Premier League match 22-ah goal 18 a team tan a khung tawh a ni.

David De Gea (Manchester United): Kum 24-a upa Spanish keeper hian Red Devils tan Premier League match 32 tun season-ah a khel a, vawi 81 zet goal shot save neiin match 10 chhung chu goal a chhuah lo.

Philippe Coutinho (Liverpool): Kum 22 leka upa nichungin Coutinho hi Reds player pawimawh a ni der tawh. Tun season EPL match 29-ah inlan tawhin goal li a khung tawh a, a goal khung te hi goal ropui tak vek an ni. Ṭhiante thun tur vawi li siamsak in ball pass 1,221 a nei a, a passing accuracy hi 80% lai a ni.

Eden Hazard (Chelsea): Belgian winger kum 24-a upa Hazard hian Blues tan EPL match 31 tun season-ah khelin goal 12 a khung a, a ṭhiante thun tur vawi riat a siamsak bawk.

Harry Kane (Tottenham Hotspur): Tun season-ah beisei loh takin a rawn par chhhuak a, kum 21 leka upa nichung siin tun season EPL match 28 a khelhah goal 19 a khung thei a, Spurs tan chuan an innghana ber a ni der tawh.

Alexis Sanchez (Arsenal): Barcelona aṭanga Arsenal pan tu hian a season hmasa berah Arsenal tan EPL match 29 khel tawhin goal 14 a khung a, a ṭhiante thun tur vawi riat a siamsak bawk.

Men's Young Player of the Year shortlist

Thibaut Courtois (Chelsea): Kum 22-a upa Belgian keeper hian tun season EPL-ah match 27 Blues tan a khel tawh a, vawi 65 save nei tawhin match kuaah goal a chhuah lo bawk.

Raheem Sterling (Liverpool): Kum 20 leka upa Real Madrid hel lai hian tun season-ah Liverpool tan EPL match 30 khel tawhin goal sarih a khung a, a ṭhiante khung tur vawi riat a siam sak bawk.