Bayern doctor Muller-Wohlfahrt a bang

Champions League quar­terfinal first leg-ah Bayern Munich-in Estadio do Dragao-ah FC Porto 3-1 in an hneh lo a, German champion hi Europe inelna aṭangin la tla lo mah se an chak loh hian nghawng lian tak a nei a, team doctor Hans-Wilhelm Muller-Wohlfahrt chu a hna aṭangin a ban phah.

Kum 72-a upa Muller-Wohlfahrt hian Bayern-ah kum 38 lai a thawk tawh a, a ban chhan chu inkhelh bana Pep Guardiola ṭawngkam a ni. Spanish manager chuan, "Inhliam vanga hun rei tak inkhel thei lo player kan kawl a, field chhungah an daih rei lo bawk. Second leg kan khelh lehna tura kan result hi a duhawm lo hle," tiin a sawi.

Guardiola hian medical department chu chak loh chhanah a puhah ngaiin Muller-Wohlfahrt chuan, "Chhan awm si loin medical department chu Porto kan hneh loh chhana puh kan ni. A ṭawngkam avang khan club nena kan inrintawnna chu a chhe vek a ni," tiin a ban chhan a sawi.

First leg-ah hian inhliam vangin player pawimawh Win­gers Franck Ribery leh Arjen Robben, midfielder Bastian Schweinsteiger leh defender David Alaba te an chhawr thei lo. Coach Guardiola chuan March 11-a inhliam Ribery dam har lutuk vangin zawhna a lo zawt tawh a, coach leh doctor inkar boruak hi Porto an khelh hma aṭang hian a ṭha lo tawh.

Muller-Wohlfahrt hi doctor satliah a ni lo a, tawnhriat nei ṭha tak niin Germany national team doctor a nih bakah khawvela tlan chak ber Usain Bolt pawh a lo enkawl tawh.