Middle East-ah Formula One

Middle East-a a hmasa ber atan kum 2004 khan Bahrain International Circuit-ah Formula One Grand Prix kan hmu a, he hmunah hian intlansiak vawi kua neih zui tawh niin kuminah a vawi sawm nan Pathianni khian an intlansiak leh dawn a ni.

Nikum khan Mercedes driver Nico Rosberg chuan pole position aṭangin bul ṭan mah se a team-mate Lewis Hamilton a tluk loin pahnihna-ah a thleng. Kuminah pawh Mercedes driver pahnih Rosberg leh Hamilton te hian ngaihven an hlawh leh hle ang. Formula one 2015 driver championship-ah pawh an ni pahnih hi inel lai an ni a, Hamilton hian point 68 hmu tawhin hma a hruai meka, Rosberg hian point 51 hmu tawhin pathumna a ni mek.

Ngaihthah theih miah loh tur bawk chu Ferrari driver Sebastian Vettel a ni ang. A ni hian championship-ah point 55 hmu tawhin pahnihna a ni mek. Kumin intlansiak hnuhnung pahnih a point hlawhchhuak zo lo Force India hian Bahrain Grand Prix-ah point an hmu a nih chuan thil mak a ni hran lo ang, he hmunah hian nikum khan Force India driver Sergio Perez chu pathumna a lo ni tawh a ni.