Europa League Wolfsburg ngam loh Napoli an ropui
Ningani zanah Liverpool manager hlui Rafael Benitez chuan a kum 55 tlin ropui takin a lawm a, a team enkawl lai Napoli chuan an pu pianchamah thilpek duhawm pe in Europa League quarter final first leg-ah Wolfsburg chu 4-1 in an sawp.
Volkswagen Arena-a inkhelah hian Napoli tan Marek Hamsik chuan goal hnih a khung bakah Gonzalo Higuain leh Manolo Gabbiadini te'n goal khat ve ve an khung bawk.
Inkhelh ṭan hma in Bundesliga-a pahnihna ni mek Wolfsburg hi chak zawk tura rin nimahse an khelmualah mikhual team Napoli an tlangnel zawk a, tun season-a an khelmuala Everton chiah la hneh lo Wolfsburg in European Competition-a an semi-final hmasa ber khelh an beiseina chu an defending pherh vangin a thamral mek. Wolfsburg hian tlang tur chuan Napoli khelmualah goal li an khung a, goal an chhuah miah loh a ngai dawn a ni.
Inkhel ṭan aṭanga minute 15 na lekah Gonzalo Higuain chuan tun season-a a goal 24 na tur rawn khungin hma takah Napoli in hma an hruai. Higuain goal luh hnuah hi chuan Napoli an hawi kir tawh lo. An captain Hamsik chuan minute 23 naah rawn khung ve leh nghalin second-half minute 63 naah he inkhela a goal hnihna a rawn khung bawk. Napoli in an la duhtawk mai lo, Gabbiadini chuan minute 76 naah an goal li na rawn khung ve lehin an dinhmun a rawn sawh nghet lehzual. German club tan Arsenal striker hlui Nicklas Bendtner chuan goal khat rawn khung ve leh mah se awmzia a nei thui tawh lo. Khualmualah Napoli 4-1 in an chak a, Europa League semi-final khel turin an dinhmun a duhawm tawh hle.
Napoli coach Rafael Benitez chuan, "Kan khel ṭha takzet a ni. He team ṭhat zia leh theihna ngah zia hi ka lo sawi tawh ṭhin a, chu kan theihna leh thiamna chu zanin khan kan pholang a ni. Roma leh Lazio kan khelh ṭum khan kan ṭhatzia kan pholang tawh a, kan khelh chhiat lai pawn Fiorentina 3-0 in kan hneh. Kan khelh ṭhatna te kha kan la thlah mai lo a, ka player-te an inthlawp ṭha em em bawk a ni," tiin a naute khelh danah a lawm hle.
Valencia leh Chelsea te Europa League lo chawi pui tawhtu Benitez hian Napoli hi Serie A-ah palina nih pui mekin pathumna dinhmun hauhtu AS Roma an phak lohna hi point sarih lai a la ni a, pathumna chin chauhin Champions League an khelh dawn avangin champion apiangin Champions League an khelh theihna Europa League champion hi an tan a pawimawh lehzual a ni.
Inkhel dang chanchin
Ningani zan Europa League quarter final first leg inkhel dangah Belgian club Club Brugge leh Ukrainian club Dnipro te Brugge khelmual Jan Breydelstadion-ah goal in pe lo in an ṭin a, second leg a hmuhnawm phah khawp ang.
Fiorentina in an Italian club pui Napoli ropui zanah an beisei ang result an hawn thei lo a, Kiev khawpuia inkhelah mual neitu Ukraine club Dynamo Kiev laka si khat an phurh reng hnu in hun pek belh minute 92 naah Khouma Babacar chuan an si phurh sutna goal a khung a, away goal hlu tak an hlawhchhuak. Second leg an khelmuala an khelh hunah goal an chhuah loh chuan semi-final an lut dawn.
Sevilla in an khelmual Estadio Ramon Sanchez Pizjuan-ah Russian club Zenit St. Petersburg an lo mikhual a, mikhual team in Alexander Ryazantsev hmangin minute 29 na lekah hma hruai mah se Sevilla in second-half a an substitution siam an chakpui a, Carlos Bacca leh Denis Suarez te'n goal khat ve ve rawn khungin 2-1 in an chak.
Khualmualah Andres Villas Boas nau te chak zo lo mah se an beisei erawh a la bo lo. Second leg an khelmuala an khelh hunah goal khat an khunga an lama an chhuah loh bawk chuan away goal rule hmangin an tlang zawk daih thei.
Inkhel result
VFL Wolfsburg 1-4 Napoli
Club Brugge 0-0 Dnipro
Dynamo Kiev 1-1 Fiorentina
Sevilla 2-1 Zenit St.
Petersburg