Rajasthan chakna Rahane

Ningani zanah India Premier League inkhel hmuhnawm kan hmu a, Rajasthan Royals in Sunrisers Hyderabad chu wicket rukin an hneh.

ACA-VDCA Stadium, Visakha­patnam-a inkhelah hian Hyderabad bat hmasa zawkah ṭangin over 20-ah run 127 bak an tlin lo a, mi panga an hloh. Sunrisers Hyderabad zinga tan run siam lamah Ravi Bopara a che ṭha deuh ber a, ball 19 a hmachhawnah run 23 vawchhuakin a tawp thleng a dam. Rajasthan tan Dhawal Kulkarni leh Pravin Tambe te chuan wicket hnih ve ve an la bawk.

Rajasthan-in an target an um a, India batsman Ajinkya Rahane chuan ball 56 a hmachhawnah run 62 vawchhuakin dinhmun duhawmah a team a hlangkai. Over 20-ah Rajasthan in run 131 vawchhuakin mi pali an hloh a, wicket rukin hnehna an chang ta a ni.

Vawiin tlai dar 4:00-ah IPL inkhel en tur a awm dawn a, Sunrisers Hyderabad leh Delhi Daredevils an inkhel ang. Zan dar 8:00-ah inkhel a awm bawk anga, Kings XI Punjab leh Kolkata Knight Riders te an inkhel ang.

Pathianni tlai dar 4:00-ah Rajasthan Royals leh Chennai Super Kings an inkhel anga, zan dar 8:00-ah Royal Challengers Bangalore leh Mumbai Indians an inkhel bawk ang.