League Cup last 16-ah Spurs Vs Chelsea

Carabao Cup-in ngaihhlut a hlawh tawk lo a ni thei a, amaherawhchu zanina inkhel turte erawh Frank Lampard-a enkawl Chelsea leh Jose Mourinho kaihhruai Tottenham an nih miau en a châkawm hle. London club pahnih hi zanin dar 12:15 hian Tottenham Hostpur Stadium-ah an inkhel ang.

Kartawp Premier League inkhelah team pahnihin point khat ve ve chauh an lawh chhuak. Blues-in West Brom laka goal thum an chhuah hnuah point khat an sual chhuak a, Spurs-in 1-0 a hma an hruai reng hnuah injury time-a penalty an chawi avangin point hnih an hlawh bawk.

An inelna tur hi League Cup a nih miau avangin team pahnihin an player ṭha ṭhenkhat an awltir a rinawm a, chutihrualin Spurs leh Blues te hian nomawi an mamawh ve ve avangin player ṭha an chhawr ngei a rinawm thung.

Lampard hian keeper pathum thlan tur a nei a, Baggies nen keeper thar Edouard Mendy a la chhawr lo. League Cup hi Mendy bul ṭanna tur a ni thei a, tlarhnungah Ben Chilwell-a'n bul a ṭan tawh a rinawm bawk.

Chutihrualin West Brom laka chesual Thiago Silva leh Marcos Alonso te an hahdam a rinawm a; Chilwell hi captain Cesar Azpilicueta, Fikayo Tomori leh Kurt Zouma te nen an intlar a rinawm.

Goal nawrtu zingah Olivier Giroud-a'n bul a la ṭan ve lo a, French striker hian bul ṭan a phu ve tawh hle. Player manto Kai Havertz-a'n inkhel pathumah bul a ṭan vek a, a awl ve a nih pawhin a awm viau. RB Leipzig aṭanga an lakluh Timo Werner-a'n goal a la khung lo a, a khelh tawh dan thlirin bench lama a awm a rinawm zawk.

Christian Pulisic leh Hakim Ziyech te an la dam hman a rinawm lo a, chutichung chuan Lampard-a'n duhthlan tur a ngah ta hle. English manager hian nipui transfer-ah pound maktaduai 200 chuang a hmang a, Premier League match thumah vawi khat chauh a la chak avangin pressure a ngah ṭan.

Tottenham Hotspur erawh Europa League qualifying an khelh a ṭul avangin an fixtures a hautak hle. Mourinho hote hian zanina Chelsea an hmachhawn zawh hian October 1, Ningani zanah Maccabi Haifa an hmachhawn lehnghal dawn a, October 4, Pathianni zanah Old Trafford-ah Manchester United an tlawh dawn avangin Portuguese manager tan team ṭha ber chhawr nghawt theih a ni lo.

Chutihrualin Mourinho hi a rin laklawh te ring bur chi a ni a, Macedonia club KF Shkendija an hmachhawn ṭum pawhin player ṭha a luhtir a, Chelsea nen pawh hian Son Heung-min leh Harry Kane ten bul a ṭan a nih pawhin thilmak a ni lo ang. Newcastle nen pawh Son-a'n first half chauh a khel a, Blues nen a inlan ngei a rinawm.

Chelsea-in Spurs hi Premier League match hnuhnung pathumah an hneh vek a, League Cup-a an intawn hnuhnun berah pawh Blues hi 2-1 in an chak.