Hamilton hrem niah Bottas che fuh

Russian Grand Prix ṭan hmain Lewis Hamilton-a'n vawi hnih dan a bawh chhiat avangin '10-second penalty' pek a ni a, world champion nilai hian pakhatna dinhmun a luah zo lo. Mercedes driver Valtteri Bottas chuan tun season chhunga a vawi hnih nan hnehna a chang.

Hamilton hian Michel Schumacher-a record (91 wins) nihrual turin vawi khat chak chauh a mamawh tawh a, beiseina pawh a nei sang. Mahse, a teammate Bottas leh Max Verstappen hnunga a thlen avangin chak hnem record siam tur chuan a nghah leh rih a la ngai dawn.

Bottas-a'n championship table lama Hamilton kal fawr lutuk tur a beng dai deuh a, an inkarah point 44 zet a la awm avang erawh chuan Britain tlangval hi a vawi sarih nan a champion ngei erawh a la rinawm hle thung.

Russia khawpui pakhat Sochi a intlansiakah hian a hmunah entu an ṭhahnem hle, mipui zat chiah chhiar ni lo mah se 30,000 chuang an pungkhawm. October 11 hian Nurburgring-ah Eifel Grand Prix an tlan dawn a, entu pawh tam lehzual zawk awm thei tura beisei a ni.