PSG chakna Icardi

Buaina hrang hrang kara leng mek Paris St Germain chuan chanchin lawmawm an nei ve leh ta. Pathianni zan French Ligue 1 inkhelah champion lai hian an mikhualna ramah Reims chu 2-0 in an hneh, goal pahnih hi striker Mauro Icardi khung a ni.

Argentine striker hian minute kuana lekah Kylian Mbappe siamsak chu goal hmahruai atan a khung. Second half-ah Mbappe leh Julian Draxler te thawhrah sengin an goal hnihna leh chak nemnghehna a khung leh bawk.

Champions League final khelh vangin PSG hian season an ṭan tlai a, player zingah coronavirus kai an awm avangin an ṭhat dan berin an khel thei lo. Hrem vangin Neymar chan mah se Brazilian forward hi a inkhel thei leh tawh a, winger Angel di Maria erawh match thum dang a la inlan thei dawn lo a ni.

Thomas Tuchel naute hian match nga an khelh aṭangin point kua an hlawh chhuak a, table-ah pasarihna dinhmun an luah. Hmahruaitu Rennes chuan khelh zat inangah point 13 an nei thung.