Gauff lakah Konta a tlawm

Pathianni tlai aṭang khan French Open khelh ṭan a ni a, hmeichhe singles huangah beisei loh result kan hmu nghal. British number 1 Johanna Konta chu a match hmasa berah Coco Gauff hneh loin a zingkawng a tawp.

Kum 26 mi Konta hi 6-3, 6-3 in a chak lo, 2019 semifinalist hian holam taka tihsual a ngah chu a tuar. Gauff erawh kum 16 mi chauh la ni mah se a hriam viau, Roland Garros main draw a khelh vawi khatnaah sulhnu ṭha a hnutchhiah nghal.

American tleirawl Gauff chuan, "Clay court hi chu a boruak a danglam em em a, chumi bakah player ṭha tak ka hmachhawn bawk. Mipui rinkai lo zawk ni mah ila ka chak ve thei a ni tih ka lantir avangin ka lawm," tiin a sawi.

Inkhel dangah Simona Halep chuan a kum 29 tlin lawm nan Sara Sorribes Tormo chu 6-4, 6-0 in a hneh a, second round-ah chuan amah ang bawka Romanian player Irina-Camelia Begu a hmachhawn leh ang.

World number 1 Halep chuan, "Piancham lawm vak theih a ni rih lo, ka awmna room-ah tui bottle ka nei tih chu ka hria," tiin ṭhiante nena intih hlimna hun a neih loh thu a sawi a, hrileng vanga chhuahvah a rem loh bakah inelna neih laia boruak dang tawn a duh lo.

Chak tura rinkai dang Victoria Azarenka leh Elise Mertens ten harsa lutuk loa an khingpui ve ve hnehin an tlang a, seeded 17-na Anett Kontaveit erawh Caroline Garcia lakah 6-4, 3-6, 6-4 in a chak lo ve thung a ni.

Grand Slam vawi sarih champion tawh Venus Williams pawh a vanglai a pel tawh, kum 40 mi Venus hi a match hmasa berah Anna Karolina Schmiedlova chuan 6-4, 6-4 in a lo hneh. American star hian chawlh mai a la tum lo, season thar chungchang an zawhna chhangin Venus chuan, "Aw, inkhelh leh ngei ka tum," tiin French Open chu a la mangṭha duh lo, nakkumah inlan leh ngei a la tum.