Catalonia-ah Quartararo a chak

Fabio Quartararo chuan Pathianni zantira tlan zawh tak MotoGP Catalonia Grand Prix-ah hnehna a chang a, Yamaha rider hian championship lama a elpui Andrea Dovizioso lehpelin hmahruaitu dinhmun a luah leh nghal bawk.

Tun season chhunga intlansiak pariatnaah Quartararo hian a tir aṭanga a tawp thlengin intlansiak a thunun, harsa lutuk loin hnehna a chang thei. Barcelona a inelna neihah hian lap hmasa berah Dovizioso a che fuh tawk lo a, a elpui tan kawng a hawnsak a ni.

Pahnihnaah Joan Mir a thleng a, amah ang bawka Suzuki bike khalhtu Alex Rins chu pathumna a ni thung. A vawi 200 nana podium lawn tum Valentino Rossi a che fuh lo, lap 16-naah chesualin a tlan tluan thei lo.

Tun season intlansiak hmasa pahnihah Quar-tararo-a'n hnehna a chang a, a hnu lamah rider hran hran zelin hnehna an chang - season kal laia a vawi thum nana chak thei French tlangval hian point 108 hmuin table chung bera awm a phu hle.