Hliam vangin Hull an buai

Premier League kai thar Hull City chuan season ṭan hmain hliam vangin buaina an tawk nghal. Defender Moses Odubajo chu khup hliam vangin thla ruk a chawlh a ngai dawn - Hull hian tun dinhmunah goalkeeper tiam loin senior player chhawr theih 14 chiah an nei.

Kum 22-a upa Odu-bajo hian season hmasa khan league-ah match 42 khelin Tigers-in Championship aṭanga Premier League-a an kaisan theih nana player pawimawh a ni a, season tharah pawh player ṭangkai tura ngaih ni mah se kar hmasa a Grimsby Town nen friendly match an khelh ṭumin a hliam.

Hull boss Steve Bruce chuan, "Hliam kan ngah avangin ngaihtuahna kan hman fimkhur a ngai a, player lakluh a ngaih bakah kan neih sa hman thiam a pawimawh. Moses kan tawrh pui a, kum tharah training a rawn zawm ve leh theih kan beisei," a ti.

Hull hian an league match hmasa ber atan champion lai Leicester City chu August 13 tlai dar 5:00 hian KC Stadium-ah an mikhual ang.