I hriat ngai loh Will Grigg hmelhriat rawh

Goal a khung leh dawn e

A khung belh zel mai dawn e

Goal a khung leh dawn e

Chu chu kan lakluh chhan a ni

Mei ang maiin Will Grigg a inlar

In tlarhnung hlauin an khur...

Wigan Athletic fan ruhkawl Sean Kennedy chuan League One khelh zawh taka an striker rinrawl Will Grigg tan 'Will Grigg's on fire!' tih hla a phuah a, youtube-ah a zai lai hi a upload - a hunlai hian heti khawp hian he hla hi a lar ang tih a ring bik kher lo mai thei.

Tunah erawh Italian zaithiam lar Gala Rizzatto-i hla 'Freed from Desire' thluka siam hla hian ITunes UK Top 100-ah 7-na dinhmun a luah pha hial. Euro 2016 khelh zawh takah pawh he hla hi fan-te sak hlawh ber a ni a, Will Grigg-a te ram Northern Ireland lam chhuak kher lo pawn an sa nasa. Wigan club chairman David Sharpe chuan Will Grigg-a hla phuahtu Kennedy hi season ticket a thlawnin a pe!

Euro a zo a, Will Grigg-a thlipui a tleh dawn chauh! UEFA-in Best player in Europe award kum dang ang bawka sem turin a ruahman a, UEFA hnuaia 55 journalist-te'n vote an thlak - player 37 hming an tarchhuah 25-naah Will Grigg a lang!

Euro khelh zawh taka Northern Ireland tana inlan miah lo striker hi UEFA hnuaia journalist ho ngaihdan aṭang chuan Manchester United hellai Paul Pogba nen an thiam dan a in ang reng a, a hnuaiah Pierre-Emerick Aubameyang leh Kevin De Bruyne te ho an awm.

Will Grigg-a chanchinin khawvel ngaih-ven a hlawh nghal a, heti khawpa league sanga khel ni si lo striker hi tu nge a nih reng? tih chu zawhna awm nghal a ni.

England tlangval

Kum 25-a upa striker hi England-a khawpui pakhat Solihull khaw chhuak a ni a, England-ah piangin seilian mah se Irish tlangval hian Northern Ireland tana khelh a thlang zawk. An ram tan age Under-19 leh Under-21 tan a inlan hnuah kum 2012 khan senior team-a a match hmasa ber khel turin koh a ni a, ram tan vawi riat inlan tawhin goal khat a khung.

Birmingham City youth academy-ah a awm ṭhin a, a bul ṭanna erawh non league club Stratford Town a ni. Stratford-ah hian season khat chauh hun a hmang hman tihin West Bromwich Albion lamin an hmu tai a, mah se Grigg hian League One club Walsall lam pan a thlang zawk.

Grigg-a inlar

Will Grigg-a'n season nga chhung Walsall tan a khel a, football khawvel hmelhriat hlawh tura a inpholan ṭanna tak tak erawh 2012-13 season a ni. Northern Ireland striker hian Walsall-a a season nganaah hian league goal 19 khungin inelna hrang hrangah match 45 a inlana, goal 28 a khung.

Season-a zawh meuh chuan Walsall player zingah Grigg aia che ṭha an awm lo a, Walsall Player of the Season leh Walsall Players' Player of the Season atan thlan a ni. Season duhawm tak hmang Grigg-a'n Brentford a pan a, mah se Walsall-a a hmingṭhatna a chhawn nung thei lo - vawi 36 a inlanah goal li chiah a khung!

Hei le Grigg!

Brentford-in beisei phak lo Will Grigg kawl reng a ṭulna an hre lo a, Milton Keynes Dons lamah loan-in an chhuahtir. MK Dons-a'n Grigg-a'n a thiamna bo hnu a chhar chhuak a, inelna hrang hrangah vawi 50 inlanin goal 22 a khung sak.

Premier League-ah pawh lo inlan tawh ṭhin Wigan Athletic chu 2015-16 season-ah Championship aṭangin League One-ah an tla thla a, Championship lama kir leh ngei tumin player an zawng nghal.

Wigan mamawh chhanna chu Will Grigg a ni a, Northern Ireland striker hi season thum chhung an hnena cham turin pound maktaduai khat bawr velin an lalut. Grigg-a'n Wigan tan a season hmasa berah league match 40 khelin goal 25 a khung a, inelna hrang hrangah vawi 43 inlanin goal 28 a khung sak.

Season a tawp meuh chuan League One-ah Will Grigg aia player langsar an awm bik lo a, Championship lama Wigan kir leh theih nan an player thawhhlawk ber tih ngam a ni a, League One top scorer a ni.