England manager turin Steve Bruce an bia

Football Association chuan Roy Hodgson thlak tur an zawng zel a, Sunderland boss Sam Allardyce chu inbiakna an neihpui hnuah England manager turin Steve Bruce chu inbiakna an neihpui ve leh ta.

England hian Steve Bruce an biak avangin Allardyce an hnawl tihna a ni lo a, manager ni tura an duhte hi a malin an dawr kual phawt dawn a ni. 'Big Sam' leh Bruce bakah hian Bournemouth manager Eddie Howe leh USA coach Jurgen Klinsmann-te chu hming lamrik zingah an tel bawk.

Tute nge thlangtu?

England manager thar ruat tur hian Football Association chuan member pa-thum awmna panel a din a, FA vice chairman David Gill, FA technical boss Dan Ashworth leh chief executive Martin Glenn-te chu member niin anni pathum thutluknaah hian England kaihruai tur chu a innghat ang.

Khawthlang media-te chuan England enkawl tur hian 'Big Sam' chu hming langsar ber a nih thu an sawi a, Sunderland boss hi Manchester United boss hlui Sir Alex Ferguson chuan FA hnenah ruai turin thurawn a pe. FA vice chairman David Gill hi Manchester United chief executive lo ni tawh a ni a, Sir Alex nen hun rei tak an lo thawhdun tawh avangin Scottish manager thurawn hi a ngai thutak hlein a rinawm.

Bruce a chiang lo

Kum 55-a upa manager hian 2014-15 season tawpah Hull City chu Premier League aṭangin a tlak pui a, mah se Championship-ah season khat chauh hun an hmang hman tihin tun season-a Premier League khel turin a kirpui lehnghal.

Mahse, tun hnaiah Hull City neitu ten club hralh tumin an zuar a, June thla lawka Hull-a enkawl zel tur thu sawitu coach hian neitu thar an nei a nih chuan Premier League club hi enkawl chhunzawm zel a inbeisei loh thu a lo sawi tawh.

Manchester United defender rinrawl lo ni tawh ṭhin chuan, "Ka hmalam hun hi ka hre lo takzet. Club hian neitu thar an nei a nih chuan min thlak ka ring a, chu chu a thleng a nih pawhin patling takin ka pawm ang. Hei hi football chu a ni. Premier League hi Aston Villa leh Newcastle pawh an awm theih lohna a ni a, league harsa a ni. Club neitu tharin ka telloa he club hi hmasawn pui theih an inbeisei a nih chuan pawi tihna ka nei lo," tiin a lo sawi tawh.

Bruce a phur

Manchester United rinrawl nichunga England tana a vanglaia inkhel miah lo Bruce chuan an ram team enkawl thei tur hming lamrik zinga a tel chu a phur thu a sawi a, England enkawl tur chuan English manager an ṭhat ber thu a sawi!

Premier League 10 Seasons Awards: Domestic Team of the Decade hiala lang phak defender ṭhin chuan, "England enkawl tur hi chuan English mi ngei ka duh thu ka lo sawi tawh ṭhin a, hemi kawngah kher hi chuan kei aia ram hmangaihna thinlung neilian an awm bik lo ang," a ti.

Birmingham City boss hlui chuan sawi chhunzawmin, "FA hian English manager kher an duh a nih chuan kan tan chance a ṭha tih hi phat rual a ni lo a, English manager ni tura hming lamrik zinga tel hi chawimawina a ni. Mahni ram team enkawl aia hna ṭha zawk hi khawvelah a awm dawn chuang em ni?" tiin England team enkawl a chak hle.