Hlawhtlinna chang turin Leicester an tuihal reng!

Leicester goalkeeper Kasper Schmeichel chuan hlawhtlinna chang tura an la tuihal reng thu sawiin season hmasaa Premier League nomawi an chawi ang khan anmahniah tumruhna a la awm reng thu a sawi.

Kum 29-a upa keeper chuan, "Chiang taka ka sawi duh chu nikuma chak duha kan tuihal ang khan 100%-in kan tui a la hal reng a ni. Kan tih dan ngaiin, rilru puthmang ngai rengin kan khel ang a, chu chuan eng chin nge min thlen dawn tih chu kan hre thuai ang," a ti.

Manchester City, Notts County leh Leeds United goalkeeper hlui chuan sawi chhunzawmin, "Hmachhawp engmah kan insiam ngai lo a, kan pen chhuak a, rim taka thawkin kan theihna zawng zawng kan pe mai a ni. Kan squad ṭhatna em em chu kan inlungrual a, kan inring tawn em em vek bawk a ni," tiin a team a fak hle.