Schalke-in Wagner an ban

Bundesliga club Schalke chuan Inrinni zana 3-1 a Werder Bremen an ngam loh hnuah coach David Wagner chu an ban a, an league match hnuhnung 18-ah chak an neih loh avangin Schalke thutlukna hi thilmak a ni hran lo. 

Schalke hian tun season La Liga a an match hmasa berah Bayern Munich chu 8-0 ngawtin an ngam lo a, Bremen an ngam loh zui avangin German club dawhtheihnain a tlin ta lo a ni ber. Kum 48 mi Wagner rual hian assistant coach Christoph Buhler leh Frank Frohling chu an hna aṭang hian chawlhtir an ni bawk a, Schalke sports director Jochen Schneider chuan, "David Wagner kan lakluh tirh khan khelmualah nasa taka hmasawn kan beisei. 

"Mahse, vanduai thlak takin kan beisei ang result kan hmu lo a, season bul ṭanna match hnihah kan tlawm bawk. Hei vang hian a thar hlaka bul ṭan kan duh a, result duhawm lo tak kan nei chungin hei hi thutlukna awlsam a ni lo," tiin a sawi. 

Germany a piang, player a nih laia USA tana international lama inlan Wagner hian Borussia Dortmund reserve team lamah a coaching career ṭanin November 2015 khan Huddersfield Town a zawm. 

Championship club hi Premier League 2017-18 season khel turin a kaipui a, a season hmasa berah hian budget nei tam lo tak chungin inhamtanpui mah se January 2019 khan inhriatthiam tawnnain an inṭhen. 

July 2019 khan beiseina sang tak nen Schalke a zawm a, mahse a pianna ramah beisei ang result a neih theih loh avangin ban a ni ta a ni.