Champions League-ah City an NIL

Premier League match li zet a zawnin an chak tawh a, goal 11 zet an khung a, an lamah goal thum chiah a lut - English top flight league-ah an vawk lal len a, Champions League-ah erawh thawnthu a danglam.

Nilaini zan khan Champions League 2022-23 season final-a an hmachhawn Inter Milan an mikhual a, City-in goal an khung lo. Inter Milan-in goal an khung bik loh avangin 0-0 in inkhel a tawp a, City tan mahni muala chak zawh loh hi result duhawm lo a ni.

City lawm lohna belhchhah turin midfielder ṭha mi Kevin de Bruyne chu hliam vangin lakchhuah a ngai a, Belgian midfielder chawlh chen tur hi he thu buatsaih a nih lai hian a la chiang lo - Pathianni zan dar 9:00-ah league match khel turin Arsenal an mikhual dawn tih theihnghilh lo la.

Haaland a bo

Erling Haaland-a'n tun season Premier League-ah match li khel tawhin, goal kua ngawt a khung tawh a, match 10 pawh khelh tlin hmain Premier League top scorer tur a chiang titih a ni ber! Mahse, Champions League-ah erawh Inter-in Haaland an dah nil hneh hle.

City tan match 104-a goal 99 ngawt khung tawh hian Manchester khaw club tana a goal 100-na khung a tum viau a, mahse, Inter player-ten Norwegian striker hi an ven hneh em avangin a che thei tlat lo - referee bulah a vui leh ṭhin.

Manchester City boss Pep Guardiola chuan, "Haaland kha player paruk velin an hual reng a, a hnungah pathum, a hmaah pathum an awm reng a ni. Khatiang kha chu eng player tan pawh a harsa," a ti a, a striker a chhan.

Van a duai

Etihad Stadium-ah Inter-in an tih tur an chiang a, Serie A champion lakah City an tal hiar thei lo - English champion hi chance nei lo erawh an ni lo a, an vanduaina erawh Inter keeper Yann Sommer-a chet ṭhat zan an tawng leh kher kha a ni!

City tan bench aṭanga luhtir Ilkay Gundogan chuan chance duhawm vawi hnih a nei a, mahse, Barcelona aṭanga City-a kir hian a hun neih a chhawr thei lo. Josko Gvardiol pawhin Sommer a paltlang thei lo a, dam lohna avanga chawl reng Phil Foden pawh lo kir mah se, a pawimawh ber goal a pai tel lo.

Pep chuan, "Team hmachhawn hautak em em kan hmachhawn a, a bik takin tlarhnung an ven dan kha en ila - an thiam bikna a ni a, an inpuitawn ṭha em em. Khati chunga kan khelh danah khan ka lawm a, chance tam tak siam kha ka beisei lo hrim hrim," a ti.

Inter lawmna

Etihad Stadium-ah Inter-in tlarhnung an veng ṭha a ni mai lo a, chance an insiam hnem hle - an vanneih zan ni se Pep-a naute bu zawlah hnehna hlado chham thei dinhmunah an ding hial.

Manchester United player hlui Matteo Darmian leh Henrikh Mkhitaryan ten chance duhawm zet an nei a, mahse, Italian club tan goal an khung thei lo ve ve - a bik takin hnai set sawt aṭanga Mkhitaryan chance hloh hi a uiawm takzet.

Inter boss Simone Inzaghi chuan, "Ka naute khelh dan ka chhuang takzet a, an khel ṭha hle a ni," tiin a player-te a fak - Inter hian Arsenal leh Bayer Leverkusen chu an la hmachhawn tur zingah an tel a, Etihad Stadium-a point hlawhchhuah hi an tan result ṭha a ni.