Chanmari-in SYS FC an hneh

Chanmari FC-in I League 3 final round khelh hma LZ Juice MPL11 match hnuhnung berah SYS FC 3-1 in an hneh. Lalsangzuala Hmar hote hian point 26 hmuin hmahruaitu Aizawl FC point khat chauhin pha lo mah se squad kim loa match thum khelh hmabak an khelh dawn avangin league champion nih a har ang.

Nimin inkhelah hian Chanmari FC tan Lalkhawpuimawia, Lalrinchhana Tochhawng, Lalhmangaihsanga leh J. Lalruatsanga ten goal khat ṭheuh an khung a, SYS tana Mesak C. Lalrinngheta goal-in score line a timawi pha lo.

Sanga hote hian bul an ṭan ṭha a, minute 20-naah Ephraim Lalremtluanga cross chu Vincent Lalduhawma'n tauh fuh lo mah se SYS defender F. Malsawmtluanga ke a per a, a per chu keeper Joseph Laltluangpuia'n tiper - Mapuia'n awlsam takin a khung.

SYS an khel ṭha lo a, coach Lalmuankima'n Ricky H. Vanlalhriatsanga leh Andreas Lalhmingmuana te bench aṭangin a luhtir. Minute 41-naah coach thutlukna a dik tih a lang a, Ricky leh V. Muana te thawhrah sengin Mesak C. Lalrinngheta'n a khung.

Lunglei club-in first half khar ṭha mah se second half an che ṭha chhunzawm lo. Minute 47-naah KC Malsawmsanga corner pet chu Vincent-a'n crossbar tauh perin ball-in goalline a pel a, referee-in goal-ah pawm lo mah se buai nuaih karah Lalhmangaihsanga'n goal-ah chantir ta tho.

Minute 60-naah Sawmsanga corner kick bawk chu captain Rinchhana'n a tauh lut a, inkhel an thunun zui. Minute 89-naah Rokima cross ṭha chu Lalruatsanga'n chiang zetin a pet goal a, 4-1 in inkhel a tawp.

SYS-in point an hmuh zawh loh avangin semifinal khel pha zingah an la tel phak lo a, inkhel hnuhnung zawkah Chawnpui FC an chak avangin Lunglei club hi paruknaah an tla thla.