A sang pali zingah Chawnpui

LZ Juice MPL11-ah Chawnpui FC-in nimin khan Ramhlun Athletic 2-0 in an hneh a, Tea Chinzah leh RM Zothansanga ten goal an khung. Lalrindika Hmar hnuaiah Chawnpuiin match li aṭangin point kua an hmu a, pasarihna aṭangin palinaah an invawrhchho.

RG Stadium-a inkhelah Chawnpuiin bul an ṭan ṭha a, goal venhim tumin bul an mah se minute thumna lekah counter attack hmangin an ṭhiat chiang hle. Ding lam aṭanga Laltluangliana cross duhthusam chu Tea Chinzah-in goal ruakah a tauh lut.

Goal luh hnuah Chawnpui an fimkhur chhunzawm a, Ramhlun Athletic-in goal an khung thei lo. Chutihrualin Ramhlunin second half-ah siphurh sut theihna hun ṭha an nei a, goalkeeper Vanlalthlamuanpuia tihsual vanga an chance neih chu Felix Lalruatsanga'n goal-ah pet mah se defender Nangsianliana'n goalline ṭangin a dang.

Benjamin Lalnunpuia pawhin goalkeeper chauh hmachhawn mah se Puia'n a dansak a; Bena hian goal ruakah goal ban a pet per a, Isak Vanlalpeka'n freekick aṭangin crossbar a pet per bawk. Ramhlun North-in siphurh sutna remchang an nei a, mah se goal hmaah an vanduai miau vangin point an hlawh chhuak lo. Chawnpui erawhin hun ṭha an bawhpelh lo a, injury time-ah Zotea'n chak nemnghehna goal khung.

Chawnpui hian phase 1-ah match sarih ṭangin point nga an hmu a, Rindika Hmar-in thuneihna a chelh hnuah match li chauh la khel mah se point kua an hmu. MPL9 champion hi round 11 khelh zawhah palinaah an awm a, semifinal khel turin an kutah engkim a awm.