December thlaah Mizo inchai awm dawn

Mizoram Wrestling Association (MWA) hruaitute chuan kumin December 9-11 chhung hian Mizo inchai an huaihawt dawn tih an sawi a, ruahman dan chuan inchai hi LPS Arena, Falkland Vengah neih tur a ni ang.

MWA hruaitute hian nimin khan Aizawl Press Club-ah chanchinbu mite kawmin, Mizo inchai 2024-ah hian weight hrang hranga inelna neih tur niin weight tina champion te chuan Title Belt bakah pawisa an hlawh zel dawn a ni.

Mipa palian champion chuan Rs 1,00,000 a hlawh dawn a, amah chotu chuan Rs 50,000 a hlawh thung ang. Tun thlatir khan Title Fight tur hi zawn a lo ni tawh a, Mizo palian inchai champion lai Lalsangliana hmachhawn turin Lalrinchhana Sailo a chiang tawh.

Inter District Wrestling Championship vawi sarihna rualin Mizoram Inchai Title Fight-a inlan tur zawnna neih fel tawh niin, palian champion cho tur zawnnnah Lalrinchhana Sailo chuan Lalremtluanga a hneh a ni.

LPS Arena, Falkland Venga inchai an neih ṭum khan North Vanlaiphai pa chak, kum 29 mi Rinchhana'n thawh thum an inchai chhungin 7-2-in hma a hruai. Thawh hnih dang la awm mah se Zobawk tlangval Remtluanga'n a dar a tihnat avangin a khel zawm thei ta lo a ni.

Hnehna a chan hnuah Lalrinchhana hian Sangliana hneh a tum thu a sawi zui nghal a, champion lai Sangliana pawhin Lalrinchhana a lawmpui thu sawiin, lawmpui viau mah se a dam a nih phawt chuan a champion belt humhim ngei a tum tih a sawi bawk.