Lalruatfela'n silver medal a la

Commonwealth Weightlifting Championships Youth, Junior leh Senior neih mekah - Mizo rawlthar Lalruatfela chuan Junior 89kg huangah silver medal a chawi chhuak.

Fiji-a inelna neihah India aiawhtu Lalruatfela hian snatch 135kg leh clean and jerk 166kg (total 301kg) chawiin pahnihna dinhmun a luah. Pakhatna chu tualchhung mi Elder Nehemiah niin, ani hian snatch 141kg, clean and jerk 172kh (total 313kg) a chawi thung.

Mizo rawlthar Ruatfela chawi zat hi senior huanga inelnaah telh nghal a ni a, hemi huangah erawh pangana dinhmun luahin medal a la phak lo thung.

MSSC Weightlifting Academy, Ramhlun Sports Complex-a inzir ṭhin Lalruatfela hian nikum khan IWLF Youth National Weightlifting Championship-ah gold medal a lo chawi chhuak tawh bawk a ni.

5th Khelo Youth Games-ah pawh khan Bungzung tlangval Ruatfela hian silver medal a lo chawi chhuak tawh. North East Games Shillong 2022-ah khan gold medal lain nikum January thlaa neih Sub Junior National-ah khan gold medal bawk a lo la tawh a ni.

Kum 2019 khan Lalruatfela hian Mizoram Weightlifting Academy a zawm a, nikum April thla khan National Centre of Excellence (NCOE), Patiala-a training nei turin an rawn thlang, tunah chuan Mizoram chauh ni loin India huap pawhin a ṭha berte zinga mi a ni der tawh.