Vanglaini Bihchianna : India hmarchhaka ISL club awmchhun NE United

(NE United chuan September 12, Ningani khan an khelmual Indira Gandhi Athletic Stadium, Guwahati-ah Media Day an hmang a,
Vanglaini aṭangin joint editor Lalzarzova kalin club zirchianna hi a nei a ni)

All India Football Federation leh an thawhpui Football Sports Development Limited ten kum 10 liam ta khan India ram football hmel hmang thlak danglamtu tur Indian Super League (ISL) an buatsaih ṭan a, inlena thar hian team thar pariat a hring chhuak.

Club thar pariat zinga pakhat chu NorthEast United Football Club a ni a, April 13, 2014 khan din niin India hmarchhak state pariat Assam, Arunachal Pradesh, Manipur, Meghalaya, Mizoram, Nagaland, Sikkim leh Tripura leh Mizoram te aiawh niin club logo-ah pawh arsi pariat a chuang.

A din ṭan dan

ISL din tirh hian inelna buatsaihtute hian club nei turin khawpui pariat Bangalore, Delhi, Goa, Guwahati, Kochi, Kolkata, Mumbai leh Pune te an thlang chhuak.

Guwahati aṭanga ISL club neih diltute hi filmstar lar John Abraham bakah Shillong Lajong neitu Larsingh Ming Sawyan leh Guwahati-a sumdawng hausa Sanjiv Narain te an ni. Season khatna ṭan hmain Sanjiv Narain a inhnukdawk a, season hnihna zawhah Shillong Lajong an inhnuk dawk leh bawk.

Jon Abraham hnuaiah NE United a kal chho a, ani bakah hian perfume sumdawnna kalpuitu Jaya Balan-a'n neitu nihna a nei a. John Abraham-a nupui Priya Runchal chu club chair person a ni.

Nomawi pakhat

NE United hi ISL club zingah budget an nei sang tawk lo a, season 10 an khelh tawh dan thlir pawhin table chanve hnuai lamah an awm tam zawk.

ISL-ah vawi hnih semifinal an lut tawh a, final an la lut lo. Chutihrualin NE United hian kumin Asia rama football inelna upa ber Durand Cup-ah an champion a, Salt Lake Stadium-ah Kolkata club lian Mohun Bagan an hneh avangin an nomawi chawi chhun hi a hlu hle.

NE United-ah Mizo an ṭhahnem

Tun season bikah NE United-in Mizo player pakhat chauh kawl mah se India hmarchhaka ISL club awmchhun hian senior team-ah Mizo player 17 an enkawl tawh. Robert Lalthlamuana'n captain hna a chelh tawh a, India tana vawi 16 khel thei Lalrindika Ralte pawhin NE United jersey hi a ha tawh.

Mizo midfielder ṭha zinga sawi tel reng tawh tur Didika chuan, "NE United hi nuam ka ti khawp mai. John Abraham hi ISL club neituah chuan a inpe a, football a tuipui bawk a, tin players senior-te min min titi pui ṭhin. Keimahni aṭangin thurawn te a la ṭhin a, club neitu zingah chuan football tuipui ber pawl a niin ka hria, hei hian min tiphur a, a club tana khelh a ti nuam. Tin, NorthEast mi kan tam a, kan inlungrual bakah fans te pawh keimahni mi leh sa an tam a, hun duhawm tak ka tawngin ka hria," tiin Vanglaini a hrilh.

Didika hian NE United bakah Mumbai City leh Atletico Kolkata tan te a khel tawh a, Lunglei pa hian East Bengal-ah hming a chher. Tun dinhmuna India innghahna Lallianzuala Chhangte leh Lalengmawia (Apuia) te pawh NE United tan hian an khel tawh bawk.

Apuia phei chu Mumbai City-in NE United aṭangin cheng nuai 200-in an lei chhuak a, a hun laia player manto ber a ni. Aizawl FC tana khel ṭhin Rochharzela'n NE United hian hming a chher hle. Chhara hian NE United tan league (38) leh cup (8) inelnaah vawi 46 khelin goal nga a khungsak a, amah aia khel tam 10 chiah an awm a ni.