NE United-a Mizo awm chhun Fredy

Durand Cup champion NorthEast United-in ISL khel tur player 26 an ziahluh zingah Mizo pakhat chauh a awm a, a hming chu Fredy Chawngthansanga a ni. Cherhlun midfielder Fredy hian Mizoram chhungah hming a a chher lo a, I League emaw ISL emaw a la khelh loh avangin Mizo football ngainatute zingah pawh hriat a la hlawh phak lo.

CS Lalnunsanga leh C. Lalnunmawii te fapa Fredy hi football ngaina chhungkua aṭanga seilian a ni a, football-a ei zawng thei turin a tet lai aṭangin an enkawl. Kum 13 mi lek a nih laiin SYS enkawl Saidan Football Academy a zawm a, Subroto Cup khelh hmain September 2016 khan FC Bengaluru academy awm turin Mizoram chhuahsan a thlang.

ISL club Bengaluru hi India rama football zirna nei changtlung ber zinga mi a ni a, Odisha winger Isak Vanlalruatfela leh Aizawl FC forward Lalrinzuala te inzirchhuahna a ni. Fredy hian Bengaluru tana a khelh lai hian India Under 15 leh Under 16 tan te a khel a, FC Bengaluru-ah contract a neih miau vangin Indian Arrows tan erawh a khel thei ta lo.

Cherhlun rawlthar hian Bengaluru hi Reliance Developmental League-ah vawi hnih a champion pui a, kum 2021-a nomawi an chawi ṭumin inhliam vangin final round a khel thei lo a, kum 2022-ah erawh final thlengin a khel thung.

FC Bengaluru lamin an bula awm turin duh mah se Fredy hi Bangalore club-a amah sawm luttu Rohit Thorat-a hnung a zui ta zawk. Rohit hian NorthEast United-ah Lead Operations - First Team & Youth Academies hna a chelh a, Bengaluru aṭangin Fredy hi a sawm chhuak.

Fredy chuan, "Kan kum a la naupan avangin kumina ka hmachhawp chu ISL-a minute neih hi a ni a, kan tan chuan first team zinga tel hrim hrim hi hmasawnna a ni. Coach leh club hotute tana lawmna thlen thei turin theihtawp ka chhuah ang," tiin Vanglaini a hrilh.